05.04.2026 | 17:21
Կալինինգրադում առևտրի կենտրոնում բռնկված հրդեհի տարածքը հասել է 1000 քառակուսի մետրի
Կայա Կալլասը Բաքվում ՀՀ-Ադրբեջան կարգավորումն է քննարկել
Քաղաքականություն
25.04.2025 | 14:54
ԵՄ արտաքին գործերի և անվտանգության քաղաքականության հարցերով բարձր ներկայացուցիչ, Եվրահանձնաժողովի փոխնախագահ Կայա Կալլասը Բաքվում բանակցություններ է անցկացրել Ադրբեջանի ԱԳ նախարար Ջեյհուն Բայրամովի հետ։ Բաքվի հաղորդմամբ՝ հանդիպմանը քննարկվել են Ադրբեջանի և Եվրամիության միջև հարաբերությունների ներկա վիճակը և հեռանկարները, այդ թվում՝ համագործակցությունը էներգետիկայի, առևտրի, տրանսպորտի և կանաչ անցման ոլորտներում, ինչպես նաև Ադրբեջանի ներդրումը տարածաշրջանային հարաբերություններում և մաքուր էներգիայի մատակարարման գործում։
Հանդիպմանը քննարկվել են նաև տարածաշրջանային անվտանգության հարցեր, այդ թվում՝ «հետհակամարտական շրջանում»։
«Բայրամովը կրկին ընդգծել է պաշտոնական Բաքվի երկարաժամկետ և սկզբունքային դիրքորոշումը խաղաղության համաձայնագրի վերաբերյալ՝ նշելով, որ Հայաստանի Սահմանադրության փոփոխությունը և Ադրբեջանի ինքնիշխանության ու տարածքային ամբողջականության դեմ պահանջների վերացումը խաղաղության համաձայնագրի ստորագրման հիմնական պայմանն է»,- ասվում է ադրբեջանական կողմի հաղորդագրությունում։
Բանակցություններին հետևած մամուլի ասուլիսում էլ Բայրամովը հայտարարել է, որ հնարավորություն են ունեցել քննարկելու ընդհանուր աշխարհագրության անվտանգության իրավիճակը, շարունակվող հակամարտությունները, դրանց ազդեցությունը տարածաշրջանի երկրների վրա և մի շարք այլ հարցեր։
«Ես իմ գործընկերոջը տեղեկացրեցի Հայաստանի և Ադրբեջանի միջև վերջին իրավիճակի մասին։ Ադրբեջանի ակնկալիքները Հայաստանից կրկին մանրամասն բացատրվեցին։ ԵՄ-ի մեր գործընկերները լավ գիտեն Ադրբեջանի դիրքորոշման մասին։ Սա նոր դիրքորոշում չէ, այն քննարկվում է արդեն երկու տարի»,- հայտարարել է Ադրբեջանի ԱԳ նախարարը՝ նշելով, թե ներկայում «Հայաստանից սպասվում է համապատասխան քայլերի ձեռնարկում՝ ԵԱՀԿ Մինսկի խմբի լուծարման և Հայաստանի Սահմանադրության մեջ Ադրբեջանի նկատմամբ տարածքային պահանջների վերացման ուղղությամբ»։
Բայրամովը նաև դժգոհել է Հայաստանի սպառազինումից՝ շեշտելով․ «Հայաստանի արագ սպառազինումը մնում է սպառնալիքի աղբյուր»։
Նա նաև ասել է, թե տարածաշրջանում «հայկական ռևանշիստական միտումների շարունակականությունը լուրջ մտահոգության առարկա է»։
«Ռևանշիստական միտումների մասին խոսելով՝ կցանկանայի անդրադառնալ ադրբեջանական և թուրքական դրոշների այրման վերջին դեպքին։ Նույնը, ցավոք, տեղի է ունեցել երեկ Ֆրանսիայում։ Մեր սպասումն այն է, որ այս երկրների համապատասխան կառույցները լուրջ քայլեր ձեռնարկեն՝ մեկ այլ երկրի ատրիբուտների այրումը որպես քրեական արարք համարելու համար»,- հայտարարել է Բայրամովը։
Ավելի վաղ ՀՀ վարչապետի մամուլի քարտուղար Նազելի Բաղդասարյանը, պատասխանելով «Արմենպրես»-ի հարցին, փոխանցել էր Նիկոլ Փաշինյանի վերաբերմունքն ապրիլի 23-ին ջահերով երթի ժամանակ Թուրքիայի և Ադրբեջանի դրոշների այրման առնչությամբ։ Փաշինյանը դատապարտել է այդ գործելակերպը՝ այն գնահատելով «անպատասխանատու և անընդունելի»:
Թարգմանությունը՝ Էմմա Չոբանյանի
