ՌԴ-ն պատրաստ է գործարք կնքել Ուկրաինայի հարցով, սակայն «որոշ տարրեր պետք է ճշգրտվեն»․ Լավրով

Ռուսաստանի ԱԳ նախարար Սերգեյ Լավրովը CBS հեռուստաալիքին տված հարցազրույցում հայտարարել է, որ Ուկրաինայում հակամարտության կարգավորման վերաբերյալ համաձայնագրի որոշ կետեր ճշգտումներ են պահանջում, գրում է Meduza-ն։

«ԱՄՆ նախագահը կարծում է, և ես կարծում եմ՝ արդարացիորեն, որ մենք ճիշտ ուղղությամբ ենք շարժվում։ ԱՄՆ նախագահի հայտարարության մեջ խոսվում է գործարքի մասին, և մենք պատրաստ ենք գործարք կնքել, բայց դեռևս կան որոշ առանձին կետեր, այս գործարքի տարրեր, որոնք պետք է վերջնականապես մշակվեն (ճշգրտվեն), և մենք զբաղված ենք հենց այդ գործընթացով»,- ասել է Լավրովը հարցազրույցում։

Նա նաև հայտարարել է, որ իր կարծիքով՝ կողմերը «շարժվում են ճիշտ ուղղությամբ», քանի որ ԱՄՆ նախագահ Դոնալդ Թրամփը «միակ համաշխարհային առաջնորդն է, որը ճանաչել է այդ իրավիճակի արմատական ​​պատճառները վերացնելու անհրաժեշտությունը»։

Հավելենք, որ Դոնալդ Թրամփի խաղաղության ծրագիրը, ըստ լրատվամիջոցների տեղեկությունների, պարունակում է Ղրիմը ռուսական ճանաչելու առաջարկ։ Ուկրաինայի նախագահ Վլադիմիր Զելենսկին էլ հայտարարել է, որ Կիևը չի ճանաչի Ղրիմի բռնակցումը։ Զելենսկիի հայտարարությունից հետո ԱՄՆ պետքարտուղար Մարկո Ռուբիոն հրաժարվել էր ապրիլի 23-ին Լոնդոն մեկնել, որտեղ նախատեսված էին բանակցություններ Ուկրաինայի, ԱՄՆ-ի ու եվրոպական երկրների պատվիրակությունների միջև՝ նվիրված ռուս-ուկրաինական պատերազմի ավարտին։ Արդյունքում, բանակցություններին մասնակցում էին ոչ թե արտաքին գործերի նախարարները, այլ ավելի ցածր մակարդակի պաշտոնյաները։

Ապրիլի 23-ին Դոնալդ Թրամփը հայտարարել էր, որ կարծում է՝ Միացյալ Նահանգները համաձայնության է եկել Ռուսաստանի հետ, բայց «պետք է բանակցեն» Ուկրաինայի նախագահ Վլադիմիր Զելենսկիի հետ։

«Ես կարծում էի, որ Զելենսկիի հետ ավելի հեշտ կլինի։ Մինչ այժմ ավելի դժվար է եղել, բայց դա նորմալ է։ Կարծում եմ՝  համաձայնության ենք եկել նրանց երկուսի հետ էլ»,- ասել էր Թրամփը։

Բացի այդ, ամերիկյան լրատվամիջոցների փոխանցմամբ՝ այսօր՝ ապրիլի 25-ին, Մերձավոր Արևելքի հարցերով ԱՄՆ նախագահի հատուկ ներկայացուցիչ Սթիվ Ուիթկոֆը ժամանելու է Մոսկվա՝ մասնակցելու ռուս-ուկրաինական պատերազմի վերաբերյալ բանակցություններին։ Փետրվարից ի վեր նա արդեն երեք անգամ հանդիպել է ՌԴ նախագահ Վլադիմիր Պուտինի հետ։

Թարգմանությունը՝ Էմմա Չոբանյանի