Ռուսական հարձակման պատճառով Զելենսկին ընդհատել է այցը ՀԱՀ և վերադառնում է Ուկրաինա

Ուկրաինայի նախագահ Վլադիմիր Զելենսկին ընդհատել է Հարավաֆրիկյան Հանրապետություն (ՀԱՀ) այցը՝ Ռուսաստանի կողմից իրականացված զանգվածային հարձակման պատճառով։ Նա անմիջապես վերադառնում է Ուկրաինա, գրում է ՌԲԿ Ուկրաինան՝ վկայակոչելով Զելենսկիի տելեգրամյան գրառումը։

Նա մեկնաբանել է Ուկրաինայի վրա Ռուսաստանի հարձակումը՝ հիշեցնելով, որ Կիևը 44 օր առաջ համաձայնել է լիակատար հրադադարի, սակայն Ռուսաստանը շարունակում է մարդկանց սպանել և խուսափել կոշտ ճնշումից ու դրա համար պատասխանատվությունից։ Զելենսկին նշել է, որ ռուսական հարձակումը մեծ ավերածություններ է առաջացրել, փրկարարական գործողությունները շարունակվում են։ Ընդհանուր առմամբ, վիրավորվել է ավելի քան 80 մարդ։ Կիևում ինը մարդ է զոհվել։

«Զինվորական հրամանատարությունից զեկույց է եղել։ Պաշտպանության նախարարին հանձնարարել եմ անհապաղ կապ հաստատել մեր գործընկերների հետ՝ ՀՕՊ-ն ուժեղացնելու մեր դիմումների վերաբերյալ»,- նշել է Զելենսկին։

Նա հավելել է, որ G20-ում նախագահող Հարավաֆրիկյան Հանրապետության նախագահ Սիրիլ Ռամաֆոսային կտեղեկացնի իրավիճակի և գլոբալ դիվանագիտական ​​ջանքերն ակտիվացնելու անհրաժեշտության մասին։ Ուկրաինայի նախագահը շեշտել է, որ հարվածների դադարեցումը պետք է լինի անհապաղ և անվերապահորեն։ Զելենսկին նաև Հարավային Աֆրիկայի օգնության հույս ունի մարդասիրական հարցերում՝ Ռուսաստանի կողմից գերեվարված և առևանգված ուկրաինացի երեխաների վերադարձի հարցում։

«Ես չեղարկում եմ այս այցի ծրագրի մի մասը և ՀԱՀ նախագահի հետ հանդիպումից հետո անմիջապես կվերադառնամ Ուկրաինա»,- նշել է Զելենսկին՝ հավելելով, որ Ուկրաինայի արտաքին գործերի նախարարը կանցկացնի բոլոր անհրաժեշտ հանդիպումները՝ երկրի քաղաքական և հասարակական առաջնորդներին իրավիճակի մասին լիարժեք տեղեկացնելու համար։

Նախօրեին երեկոյան Զելենսկին կնոջ հետ ժամանել է ՀԱՀ։ Նա հանդիպումներ էր նախատեսել Հարավաֆրիկյան Հանրապետության նախագահ Սիրիլ Ռամաֆոսայի, ինչպես նաև աֆրիկյան երկրների քաղաքական, հասարակական և ուսանողական համայնքների ներկայացուցիչների հետ։

Հավելենք, որ ապրիլի 24-ի գիշերը ՌԴ ուժերը զանգվածային հարձակման էին ենթարկել Ուկրաինայի տարածքը՝ արձակելով տարբեր տեսակի 70 հրթիռ, այդ թվում՝ բալիստիկ հրթիռներ, և 145 անօդաչու թռչող սարք։ Ըստ ուկրաինական կողմի՝ հակաօդային պաշտպանության ուժերը ոչնչացրել են 48 հրթիռ և 64 անօդաչու թռչող սարք, ևս 68 ԱԹՍ-ներ կորել են։

Ըստ տեղեկությունների՝ Կիևում հարձակման հետևանքով մահացել է 9, որոշ լուրերի՝ 10 մարդ, ավելի քան 70 վիրավոր կա։

Թարգմանությունը՝ Էմմա Չոբանյանի