Կինոն հոգևոր տարածք է․ Ժաննա Անդրեասյանը ուղերձ է հղել Հայ կինոյի օրվա կապակցությամբ

Ապրիլի 16-ը Հայ կինոյի օրն է: Ի նշանավորումն օրվա՝ ՀՀ կրթության, գիտության, մշակույթի և սպորտի նախարար Ժաննա Անդրեասյանը և նախարարի տեղակալ Դանիել Դանիելյանը Հենրիկ Մալյանի անվան կինոդերասանի թատրոնում հանդիպել են կինոաշխարհի ներկայացուցիչներին․ տեղեկացնում են ԿԳՄՍՆ-ից։

Նախարար Ժաննա Անդրեասյանը, շնորհավորելով ոլորտի ներկայացուցիչներին տոնի կապակցությամբ, կարևորել է նրանց դերը հայ կինոյի զարգացման ու հանրահռչակման, նոր ժամանակներին համահունչ կայացման գործում:

«Կինոն՝ որպես արվեստ, այն գործունեությունն է, որը հանրության հետ խոսելու բացառիկ հնարավորություն է ընձեռում, իսկ հանրության հետ խոսելը՝ մեծագույն շնորհ է»,- ասել է Ժաննա Անդրեասյանը:

Նախարարն անդրադարձել է ոլորտում պետական քաղաքականությանը՝ նշելով, որ ՀՀ կառավարությունն առանձին ծրագիր է իրականացնում մշակույթի ոլորտի հեղինակավոր փառատոների և մրցանակաբաշխությունների մասնակցած և մրցանակի արժանացած մշակույթի գործիչներին գնահատելու և խրախուսելու նպատակով: Ժաննա Անդրեասյանը նաև ասել է, որ Կառավարությունը նախորդ շաբաթ հաստատել է ֆիլմարտադրության ոլորտում ներդրումների մասնակի փոխհատուցման կարգը, որով մինչև 35 տոկոս վերադարձ է նախատեսվում կինոյի ոլորտում կատարվող ներդրումների համար։

Կինոյի մասնակի ներդրումների վերադարձը, ըստ Ժաննա Անդրեասյանի, կինոոլորտում զարգացման նոր խթան կհանդիսանա՝ բացելով գործունեության լայն դաշտ։ Նախարարը վստահեցրել է, որ պետությունը կանգնած է լավ գաղափարների կողքին, նաև կոչ է արել ուսանողներին չսահմանափակել երազանքները և ակտիվորեն մասնակցել տարբեր ծրագրերի:

«Ուրախ եմ, որ հայկական կինոն, հատկապես վերջին տարիներին, բավականին մեծ ակտիվություն է ցուցաբերում տարբեր միջազգային հարթակներում ներկայանալու, փառատոներում հաջողություններ գրանցելու հարցում: Պետության քաղաքականությունը միտված է կինոարտադրությունը որպես ինդուստրիա կայացնելուն»,- ասել է նախարարը՝ մասնավորապես անդրադառնալով աշխարհի ամենահեղինակավոր Անսի անիմացիոն ֆիլմերի միջազգային կինոփառատոնի կարճամետրաժ ֆիլմերի «Հեռանկարներ» մրցութային ծրագրում ընդգրկված «Օձի ապուր» դեբյուտային անիմացիոն ֆիլմին: Այն նկարահանվել է ԿԳՄՍ նախարարության աջակցությամբ, որի ռեժիսորը Զաքար Դեմիրճյանն է, իսկ պրոդյուսերը՝ Րաֆֆի Մովսիսյանը:

Հանդիպման շրջանակում տեղի է ունեցել նաև «Օձի ապուր» դեբյուտային անիմացիոն ֆիլմի դիտումը, որին հաջորդել է ֆիլմի քննարկումը:

ՀՀ ԿԳՄՍ նախարար Ժաննա Անդրեասյանի շնորհավորական ուղերձը Հայ կինոյի օրվա կապակցությամբ

«Հարգելի՛ կինոգործիչներ,

Շնորհավորում եմ ձեզ Հայ կինոյի օրվա կապակցությամբ։

Այս օրը հնարավորություն է վերագնահատելու հայկական կինոյի անցած ուղին և երախտագիտությամբ հիշելու բոլոր նրանց, ովքեր կերտել ու պահպանել են այն՝ որպես մեր մշակույթի ինքնատիպ ու կարևոր ոլորտ։

Կինոն հոգևոր տարածք է, որտեղ արտացոլվում է մարդու ներաշխարհը՝ պատմելով սիրո, հայրենիքի ու ճակատագրերի մասին տվյալ ժամանակի լեզվով։ Հայ կինոն մեր ազգային ինքնության ու պատմության արտահայտությունն է, ինչպես նաև համաշխարհային մշակույթին կապող ամուր օղակ։

Բոլորովին վերջերս՝ 2023 թվականին, հայկական կինոն նշեց իր մեկդարյա հոբելյանը, որին հաջորդեց մեծանուն ռեժիսոր Սերգեյ Փարաջանովի հարյուրամյա հոբելյանը։ 2025 թվականը ևս կարելի է համարել հայկական կինոյի տարի։ Այն հագեցած է մեր ճանաչված ու սիրված կինոգործիչների հոբելյաններով՝ Հենրիկ Մալյան, Ռոզա Ֆրանգուլյան, Հարություն Խաչատրյան, Ատոմ Էգոյան, Ռոբերտ Սահակյանց։

Ոլորտի սիրելի՛ ներկայացուցիչներ, ձեր նվիրումի շնորհիվ հայկական կինոն շարունակում է զարգանալ և դիրքավորվել միջազգային կինոհարթակներում՝ ներկայանալով կինոհանրությանը։ Պահպանելով հայկական կինոյի դիմագիծը՝ դուք քայլ առ քայլ, հաստատուն կերպով շարժվում եք առաջ՝ ժամանակակից կինոաշխարհի պահանջներին համահունչ։ Հայկական կինոն հարստանում է ձեր՝ ռեժիսորների, սցենարիստների, դերասանների, օպերատորների և մյուս մասնագետների շնորհիվ, որոնք կադրում և կադրից դուրս իրականացնում են կարևոր առաքելություն։ Նվաճումներն ակնհայտ են և տեսանելի՝ «Օսկարի» մրցանակաբաշխության կարճ ցանկում ընդգրկվելը, հաղթանակներ միջազգային անիմացիոն, խաղարկային և վավերագրական ֆիլմերի փառատոներում, ներկայացվածություն կինոշուկաներում:

Ոլորտի զարգացումը նաև պետական հետևողական քաղաքականության և առաջնահերթության արդյունք է։ Կինոյի հիմնադրամի ստեղծում, Հայաստանում կինոփառատոների անցկացում, տարբեր երկրների հետ երկկողմանի համագործակցության հուշագրերի ստորագրում, համատեղ ֆիլմարտադրության խրախուսում, ներդրումների վերադարձի մեխանիզմի ներդնում. այս բոլոր քայլերը միտված են հայկական կինոյի զարգացմանը, Հայաստանը միջազգային կինոարտադրողների համար գրավիչ և հուսալի գործընկեր դարձնելուն։

Մաղթում եմ բոլորին ստեղծագործական նոր ներշնչումներ և հաղթանակներ, կինոն սիրող ու գնահատող հանդիսատեսով լեցուն դահլիճներ։

Շնորհավո՛ր տոնդ, Հայ կինո»: