18.12.2025 | 11:33
Մայր Աթոռը հորդորում է հանդարտություն պահպանել․ հայտարարություն՝ կայանալիք հավաքից առաջ
ՀՀ-ԵՄ մուտքի արտոնագրերի ազատականացման երկխոսության շրջանակում ՀՀ է ժամանել ԵՄ փորձագիտական երկրորդ առաքելության պատվիրակությանը
Քաղաքականություն
11.04.2025 | 23:22
ՀՀ ԱԳՆ Եվրոպայի վարչության պետ Սամվել Մկրտչյանն ընդունել է ՀՀ-ԵՄ մուտքի արտոնագրերի ազատականացման երկխոսության շրջանակներում Հայաստան ժամանած ԵՄ փորձագիտական երկրորդ առաքելության պատվիրակությանը։ Այս մասին տեղեկացնում են ՀՀ ԱԳՆ-ից։
Հանդիպմանը հայկական կողմից մասնակցել են ՀՀ արտաքին գործերի նախարարության Եվրոպայի, մարդու իրավունքների և հումանիտար հարցերի, միջազգային պայմանագրերի և իրավունքի, հյուպատոսական վարչությունների և ՀՀ ներքին գործերի նախարարության ներկայացուցիչներ: ԵՄ փորձագիտական առաքելության կազմում էին՝ ԵՄ անդամ երկրների ոլորտային փորձագետներ, Եվրոպական հանձնաժողովի, Արտաքին գործերի եվրոպական ծառայության և Հայաստանում ԵՄ պատվիրակության ներկայացուցիչներ։
Հանդիպման ընթացքում քննարկվել են մարդու հիմնարար իրավունքներին և այդ ոլորտում միջազգային համագործակցությանն առնչվող մի շարք հարցեր: ԵՄ փորձագիտական առաքելության պատվիրակության ներկայացուցիչները տեղեկացրել են այցի շրջանակներում կազմակերպված հանցավորության, ապօրինի գույքի բռնագանձման, կոռուպցիայի և ֆինանսական հանցագործությունների կանխարգելման ու դրանց դեմ պայքարին առնչվող հարցերի շուրջ ՀՀ շահագրգիռ գերատեսչությունների հետ ունեցած քննարկումների վերաբերյալ:
Այցի նպատակը Հայաստանի պատրաստվածության ընդհանուր գնահատումն է՝ ՀՀ-ԵՄ մուտքի արտոնագրերի ազատականացման շուրջ երկխոսության գործողությունների ծրագրի համապատասխան հենանիշների մշակման նպատակով:
