Ադրբեջանում հերթական լրագրողն է հայտնվել մեղադրյալի աթոռին

Ադրբեջանի իշխանությունները ևս մեկ լրագրողի են մեղադրանք առաջադրել։ Տեղական լրատվամիջոցների հաղորդմամբ՝ անկախ լրագրող Անար Աբդուլլային մեղադրանք է առաջադրվել իրավապաշտպան Անար Մամեդլիի դեմ հարուցված քրեական գործով։

Աբդուլլայի փաստաբան Գյունայ Իսմայիլովան նշել է, որ լրագրողին կանչել են Գլխավոր դատախազության քննչական վարչություն, որտեղ նրան մեղադրանք է առաջադրվել 192 հոդվածով (ապօրինի ձեռնարկատիրություն), 193-1 (կեղծ ձեռնարկատիրություն), 206 (մաքսանենգություն), 213 (հարկերից խուսափելու, գործազրկության ապահովագրության վճարներ, պարտադիր բժշկական ապահովագրություն կամ պարտադիր պետական ​​սոցիալական ապահովագրություն), 206.3.2 (մաքսանենգություն, որը կատարվել է մի խումբ անձանց կողմից նախնական համաձայնությամբ) և 320 (պաշտոնական փաստաթղթերի, պետական ​​պարգևների, կնիքների, ձևաթղթերի, կեղծ փաստաթղթերի ապօրինի արտադրություն, վաճառք կամ օգտագործում) հոդվածներով։

Անար Աբդուլլան վերցվել է ոստիկանության հսկողության տակ։

Մամեդլին ձերբակալվել է 2024 թվականի ապրիլի 29-ին։ Ապրիլի 30-ին նրան մեղադրանք է առաջադրվել Ադրբեջանի քրեական օրենսգրքի 206.3.2 հոդվածով (մաքսանենգությունը, որը կատարվել է մի խումբ անձանց կողմից նախնական համաձայնությամբ):

Մի շարք միջազգային կազմակերպություններ, ինչպես նաև ԱՄՆ Պետքարտուղարությունը, Ադրբեջանի կառավարությանը կոչ են արել անհապաղ ազատ արձակել Անար Մամեդլիին և անարդարացիորեն ձերբակալված այլ անձանց:

Տեղական և միջազգային կազմակերպությունները պնդում են, որ Ադրբեջանում կա ավելի քան 300 քաղբանտարկյալ, այդ թվում՝ Անար Մամեդլին։

Թարգմանությունը՝ Էմմա Չոբանյանի