19.02.2026 | 13:32
35-ամյա Ֆոնտանան նվաճել է 14-րդ օլիմպիական մեդալը․ ձմեռային Խաղերում ավելի շատ մեդալ ունի միայն մեկ մարզիկ
Թրամփը հայտարարել է Իրանի հետ ուղիղ բանակցությունների մասին․ շաբաթ օրը բարձր մակարդակի հանդիպում տեղի կունենա
Քաղաքականություն
08.04.2025 | 10:37
ԱՄՆ նախագահ Դոնալդ Թրամփը հայտարարել է, որ Վաշինգտոնն ու Թեհրանն ուղիղ բանակցություններ են սկսում Իրանի միջուկային ծրագրի շուրջ։ Սա անակնկալ հայտարարություն է այն բանից հետո, երբ իրանցի պաշտոնյաները մերժել էին նման բանակցություններ վարելու՝ ԱՄՆ-ի կոչերը, գրում է Reuters-ը։
Թրամփը նաև կոշտ նախազգուշացում է արել, որ եթե բանակցությունները ձախողվեն, «Իրանը մեծ վտանգի տակ կլինի»:
Իրանը պաշտոնապես չի արձագանքել Թրամփի հայտարարություններին։ Վերջին շաբաթներին Թեհրանը դեմ էր Թրամփի պահանջներին՝ իր միջուկային ծրագրի շուրջ ուղիղ բանակցությունների վերաբերյալ, սակայն բաց է թողել անուղղակի քննարկումների դուռը:
«Մենք ուղիղ բանակցություններ ենք վարում Իրանի հետ, և դրանք արդեն սկսվել են: Այն կշարունակվի շաբաթ օրը: Մենք շատ մեծ հանդիպում ունենք և կտեսնենք, թե ինչ կարող է տեղի ունենալ։ Ես կարծում եմ՝ բոլորը համաձայն են, որ գործարք կնքելը նախընտրելի է»,- ասել է Թրամփը լրագրողներին Սպիտակ տանը Իսրայելի վարչապետ Բենիամին Նեթանյահուի հետ բանակցությունների ժամանակ։
ԱՄՆ նախագահն ասել է, որ շաբաթ օրը Իրանի հետ բանակցությունները շատ բարձր մակարդակի են լինելու, սակայն հրաժարվել է մանրամասնել: Նա նաև չի նշել, թե որտեղ կկայանան բանակցությունները, սակայն չի բացառել, որ հնարավոր է գործարքի հասնել:
«Իրանը չի կարող միջուկային զենք ունենալ, և եթե բանակցությունները հաջող չանցնեն, ես իրականում կարծում եմ, որ դա շատ վատ օր կլինի Իրանի համար»,- հայտարարել է Թրամփը։
Աղբյուրը նշում է, որ նման բանակցությունները տեղի չեն ունենա առանց Իրանի հոգևոր առաջնորդ այաթոլլահ Ալի Խամենեիի բացահայտ հավանության, որը փետրվարին հայտարարել էր, որ ԱՄՆ-ի հետ բանակցությունները «խելացի, իմաստուն կամ պատվաբեր չեն»:
Թրամփի այս հայտարարությունից ժամեր առաջ Իրանի արտաքին գործերի նախարարության խոսնակ Էսմայիլ Բաղային ասել էր, որ Իրանը սպասում է ԱՄՆ պատասխանին անուղղակի բանակցություններ վարելու Թեհրանի առաջարկի վերաբերյալ։
Իրանցի բարձրաստիճան պաշտոնյան հանգստյան օրերին Reuters-ին ասել էր որ Թեհրանը ցանկանում է շարունակել անուղղակի բանակցություններն Օմանի միջոցով:
Իրանցի պաշտոնյան անանունության պայմանով ասել է, որ համաձայնության հասնելու համար կարող է պահանջվել մոտ երկու ամիս՝ պատճառաբանելով այն մտավախությունները, որ Իրանի վաղեմի թշնամի Իսրայելը կարող է սկսել իր հարձակումը, եթե բանակցությունները ձգձգվեն:
Թարգմանությունը՝ Էմմա Չոբանյանի
