Իլոն Մասկը հանդես է եկել ԱՄՆ-ի ու Եվրամիության միջև մաքսատուրքերի վերացման օգտին՝ Թրամփի սահմանած տուրքերի ֆոնին

Ամերիկացի միլիարդատեր, ԱՄՆ կառավարության արդյունավետության դեպարտամենտի (DOGE) ղեկավար Իլոն Մասկը հանդես է եկել Եվրամիության հետ զրոյական առևտրային մաքսատուրքերի օգտին: Այս մասին նա հայտարարել է Իտալիայի «Լիգա» կուսակցության համագումարին ուղղված տեսաուղերձում, փոխանցում է DW-ի ռուսական ծառայությունը։

«Ի վերջո, ես հուսով եմ, որ համաձայնություն ձեռք կբերվի։ Ե՛վ Եվրոպան, և՛ Միացյալ Նահանգները, իմ կարծիքով, պետք է անցնեն զրոյական մաքսատուրքերի, ըստ էության, ստեղծելով ազատ առևտրի գոտի Եվրոպայի և Հյուսիսային Ամերիկայի միջև։ Ես հուսով եմ, որ ԱՄՆ-ն ու Եվրոպան կկարողանան շատ սերտ գործընկերություն հաստատել։ Եթե մարդիկ ցանկանում են աշխատել Եվրոպայում կամ ցանկանում են աշխատել Հյուսիսային Ամերիկայում, նրանց պետք է թույլ տալ դա անել»,- հայտարարել է Մասկը։

Նա նշել է, որ դա «իր խորհուրդն է նախագահին»։

Մասկի այս հայտարարությունը հնչել է այն բանից հետո, երբ ԱՄՆ նախագահ Դոնալդ Թրամփն ապրիլի 2-ին հայտարարել էր, որ 20% մաքսատուրքեր է սահմանում ԵՄ-ից ԱՄՆ ներմուծվող բոլոր ապրանքների համար։ Մեքենաների և պահեստամասերի ներմուծման համար էլ 25 տոկոս հարկ է սահմանվում։

Թրամփի այս որոշումն առաջիններից մեկը քննադատել էր Իտալիայի վարչապետ Ջորջիա Մելոնին է՝ մաքսատուրքերն անվանելով «սխալ և ոչ մի կողմին չգոհացնող»։

«Մենք կանենք հնարավոր ամեն ինչ՝ ԱՄՆ-ի հետ համաձայնության հասնելու և առևտրային պատերազմից խուսափելու համար, որն անխուսափելիորեն կթուլացնի Արևմուտքին՝ հօգուտ այլ գլոբալ խաղացողների»,- ասել է Մելոնին։

Հավելենք, որ Մելոնին աջ պոպուլիստական ​​«Իտալիայի եղբայրներ» կուսակցության առաջնորդն է, որը «Լիգա»-ի հետ միասին իշխող կոալիցիայի մաս է կազմում։

Թարգմանությունը՝ Էմմա Չոբանյանի