Մարտուն Գրիգորյանը մի քանի անգամ խմբագրել է իր գրառումը․ ինչ է փոխվել տեքստում

Վարդան Ղուկասյանին համայնքապետ դառնալու հարցում աջակցելու մասին հայտարարած Մարտուն Գրիգորյանը, պարզվում է, ֆեյսբուքյան էջում մի քանի անգամ խմբագրել է իր գրառումը։ Factor.am-ն ավելի վաղ հայտնել էր, որ Մարտուն Գրիգորյանը գրառումն արել է դեռ կեսգիշերին, սակայն, ըստ ամենայնի, այն նախ եղել է փակ և միայն այսօր օրվա երկրորդ կեսին է բացվել սոցցանցի բոլոր օգտատերերի համար և 23։59-ին արված գրառումը հետագայում մի քանի անգամ խմբագրվել է։

Նա դիմել է այն քաղաքական ուժերին, որոնք կանգնած են եղել Ռուբեն Մխիթարյանի և Կարեն Սիմոնյանի հետում, ապա հանել է այդ շեշտադրումը։

Նախնական տարբերակում գրված է եղել․ «Ռուբենը, Կարենն ու իրենց հետևում կանգնած քաղաքական ուժերը շատ լավ գիտենալով այս մասին՝ անհասականալի շտապողականությամբ հայտարարեցին իրենց քայլերի և տվյալ թեկնածուին սատարելու մասին, որով անհնարին դարձրեցին քննարկելու այլընտրանքային, քիչ խոցելի տարբերակ գտնելու ճանապարհը»։

Փոփոխված տարբերակում գրել է․«Այս երկու թիմերը շատ լավ գիտենալով այս մասին՝ անհասականալի շտապողականությամբ հայտարարեցին իրենց քայլերի և տվյալ թեկնածուին սատարելու մասին, որով անհնարին դարձրեցին քննարկելու այլընտրանքային, քիչ խոցելի տարբերակ գտնելու ճանապարհը»։

«Եվ այսպես, ‹‹Մեր քաղաքը›› դաշինքը հայտարարում է, որ կտա անհրաժեշտ քանակությամբ քվե՝ Ռուբենի ու Կարենի կողմից սատարվող թեկնածու Վարդան Ղուկասյանին՝ առանց որևէ պաշտոնի, ակնկալիքի և որևէ պայմանավորվածության»,-այս հատվածում Մարտուն Գրիգորյանը հատուկ շեշտել է, որ Վարդան Ղուկասյանին սատարում են Կարեն Սիմոնյանն ու Ռուբեն Մխիթարյանը, իսկ հետո որոշել նրանց անունները հանել գրելով․

«Եվ այսպես, ‹‹Մեր քաղաքը›› դաշինքը հայտարարում է, որ կտա անհրաժեշտ քանակությամբ քվե՝ մյուս երկու ուժերի կողմից սատարվող թեկնածու Վարդան Ղուկասյանին՝ առանց որևէ պաշտոնի, ակնկալիքի և որևէ պայմանավորվածության»։

Մարտուն Գրիգորյանը գրառման նախնական տարբերակում նաև գրել է, որ Ղուկասյանի կառավարման շրջանում տեղի ունեցողների համար պատասխանատվություն են կրում նաև Կարեն Սիմոնյանն ու Ռուբեն Մխիթարյանը։

«Եվ հետագա ամբողջ պատասխանատվությունը՝ քաղաքի հետագա ճակատագիրը՝ ՔՊ-ին տալու, չտալու մասով, այսուհետ թեև վերցնում են իրենց վրա երեք ուժերը՝ Վարդան Ղուկասյանը, Ռուբեն Մխիթարյանը և Կարեն Սիմոնյանը, այնուամենայնիվ, բոլորդ էլ գիտեք՝ ես ձեռքերս ծալած չեմ նստելու և շարունակելու եմ անել ամեն ինչ, որ ՔՊ-ն Գյումրիում քաղաքապետ չունենա»։

Իսկ ահա վերջնական տարբերակում հանել է նրանց անունները․ «Եվ հետագա ամբողջ պատասխանատվությունը՝ քաղաքի հետագա ճակատագիրը՝ ՔՊ-ին տալու, չտալու մասով, այսուհետ թեև վերցնում են իրենց վրա երեք ուժերը՝ Վարդան Ղուկասյանի գլխավորությամբ, այնուամենայնիվ, բոլորդ էլ գիտեք՝ ես ձեռքերս ծալած չեմ նստելու և շարունակելու եմ անել ամեն ինչ, որ ՔՊ-ն Գյումրիում քաղաքապետ չունենա»։

Արդեն նշել էինք, որ նախնական և խմբագրված տարբերակների միջև ամենաէական տարբերությունը հետևյալ նախադասությունն է, որը սկզբանական տարբերակում չի եղել․ «Բոլորդ համոզվեցիք՝ իրար միացած քաղաքական ուժերը առանց իմ և «Մեր քաղաքը» դաշինքի որոշման ոչ մի բան չեն կարողանալու անել Գյումրիում և ամեն ինչ, հետայսու էլ, կախված է լինելու «Մեր քաղաքը» դաշինքի քվեարկություններից»։

Նարեկ Կիրակոսյան