17.07.2026 | 17:20
Հրայր Թովմասյանը դիմել է Մարդու իրավունքների եվրոպական դատարան
Թրամփի վարչակազմը «լսում է Մոսկվայի դիրքորոշումը և հասկանում մտահոգությունները»․ Պուտինի ներկայացուցիչն ԱՄՆ-ում բանակցությունների մանրամասներ է փոխանցել
Քաղաքականություն
04.04.2025 | 10:50
Ռուսաստանի ուղղակի ներդրումների հիմնադրամի ղեկավար, օտարերկրյա երկրների հետ ներդրումների և տնտեսական համագործակցության հարցերով ՌԴ նախագահի հատուկ ներկայացուցիչ Կիրիլ Դմիտրիևը հայտնել է, որ «Թրամփի վարչակազմի առանցքային անդամների» հետ քննարկել է ԱՄՆ-ի և Ռուսաստանի միջև հարաբերությունների վերականգնման հարցը։ Վաշինգտոն մեկնած Դմիտրիևի հայտարարությունները ներկայացրել է ՏԱՍՍ գործակալությունը, ըստ որի՝ Պուտինի ներկայացուցիչը զրուցել է «լրագրողների փոքր խմբի հետ», փոխանցում է Meduza-ն։
Դմիտրիևը հայտարարել է, որ «վերջին երկու օրերին» Վլադիմիր Պուտինի հանձնարարությամբ հանդիպումներ է անցկացել, որոնց հիմնական թեմաներից մեկը եղել է «Մոսկվայի և Վաշինգտոնի միջև երկխոսության վերականգնումը»։
«Եվ մենք, իհարկե, տեսնում ենք, որ շատ խաղացողներ, տարբեր երկրներ փորձում են խաթարել այս երկխոսությունը: Եվ նրանք փորձում են խանգարել այն հարցերի լուծմանը, որոնք պետք է լուծվեն»,- ասել է Պուտինի ներկայացուցիչը։
Նրա խոսքով՝ ԱՄՆ նախագահ Դոնալդ Թրամփի վարչակազմը, ի տարբերություն նախկին նախագահ Ջո Բայդենի վարչակազմի, «լսում է Ռուսաստանի դիրքորոշումը և հասկանում է նրա մտահոգությունները»։ Դմիտրիևն ասել է, որ հանդիպումներում քննարկվել են նաև տնտեսական և ներդրումային բնույթի հարցեր։
«Մենք տեսնում ենք ամերիկյան ընկերությունների՝ Ռուսաստան վերադառնալու մեծ ցանկություն: Եվ մենք տեսնում ենք, որ շատ ամերիկյան ընկերություններ պարզապես ցանկանում են զբաղեցնել այն տեղը, որտեղից հեռացել են եվրոպական ընկերությունները», – նշել է Դմիտրիևը՝ հավելելով, որ «միայն այնտեղ, որտեղ դա օգտակար է Ռուսաստանի համար»։
Նա նաև հայտնել է, որ քննարկվել են Արկտիկայում հնարավոր համագործակցությունը հազվագյուտ մետաղների և «տարբեր այլ ոլորտներում»։
Բացի այդ, Դմիտրիևը հայտնել է, որ Մոսկվան և Վաշինգտոնը քննարկել են ուղիղ չվերթների վերականգնման հարցը։
«Մեր դեսպանատունը, ԱԳՆ-ն աշխատում է շատ մեծ թվով կարևոր խնդիրների, այդ թվում՝ ռուսաստանցիների համար գործնական հարցերի ուղղությամբ։ Եվ փաստացի ակտիվ աշխատանքներ են տարվում ուղիղ չվերթների վերականգնման ուղղությամբ։ Հույս ունենք այս հարցում առաջընթաց գրանցել»,- ասել է նա։
Դմիտրիևը հավելել է՝ Ռուսաստանի և ԱՄՆ-ի միջև նոր բանակցությունների ժամկետները կորոշվեն «առաջիկայում»։ Նա նաև շեշտել է, որ Ռուսաստանի և ԱՄՆ-ի հարաբերություններում «դրական դինամիկա» է գրանցվում, և կա «ստեղծագործական ոգի»։
Ավելի վաղ լրատվամիջոցները տեղեկություններ էին տարածել, որ Դմիտրիևը Վաշինգտոնում հանդիպել է Մերձավոր Արևելքի հարցերով Դոնալդ Թրամփի հատուկ բանագնաց Սթիվ Ուիթկոֆի հետ։
Թարգմանությունը՝ Էմմա Չոբանյանի
