17.07.2026 | 17:20
Հրայր Թովմասյանը դիմել է Մարդու իրավունքների եվրոպական դատարան
Թրամփը չի ցանկանում պատերազմել Իրանի հետ․ Սպիտակ տունը քննարկում է անուղղակի բանակցություններ անցկացնելու՝ Իրանի առաջարկը․ Axios
Քաղաքականություն
02.04.2025 | 17:50
Սպիտակ տունը լրջորեն դիտարկում է Իրանի առաջարկը միջուկային գործարքի հետ կապված անուղղակի բանակցությունների վերաբերյալ, միաժամանակ, զգալիորեն ավելացնելով ամերիկյան զորքերի թիվը Մերձավոր Արևելքում, եթե նախագահ Թրամփը որոշի ռազմական հարվածներ հասցնել։ Այս մասին Axios-ին ասել են ամերիկացի երկու պաշտոնյաներ:
Թրամփը բազմիցս ասել է, որ նախընտրում է գործարքը, սակայն զգուշացրել է, որ առանց դրա «ռմբակոծություններ կլինեն»: Թրամփը երկու ամիս ժամկետ է տվել Իրանին գործարքի հասնելու համար։
Լրատվամիջոցը գրում է, որ Սպիտակ տանը դեռևս ներքին բանավեճ է ընթանում նրանց միջև, ովքեր կարծում են, որ գործարքը հնարավոր է ձեռք բերել, և նրանց միջև, ովքեր բանակցությունները համարում են ժամանակի կորուստ և պատասխան հարված Իրանի միջուկային օբյեկտներին: Միևնույն ժամանակ, Պենտագոնը ներգրավված է Մերձավոր Արևելքում ուժերի զանգվածային կուտակման մեջ: Եթե Թրամփը որոշի, որ ժամանակն ավարտվել է, «նա պատրաստ կլինի պահել լիցքավորված ատրճանակը»։
Ամերիկացի պաշտոնյան ասել է, որ հանգստյան օրերին Թրամփը ստացել է Իրանի գերագույն հոգևոր առաջնորդ Ալի Խամենեիին երեք շաբաթ առաջ ուղարկած նամակի պաշտոնական պատասխանը։ Չնայած Թրամփն առաջարկել է ուղղակի միջուկային բանակցություններ՝ իրանցիները կհամաձայնեն միայն Օմանի միջնորդությամբ անուղղակի բանակցություններին:
Ամերիկացի պաշտոնյան ասել է՝ Թրամփի վարչակազմը կարծում է, որ ուղիղ բանակցությունները հաջողության ավելի մեծ շանսեր կունենան, սակայն չի բացառվում իրանցիների առաջարկած ձևաչափը, և չի առարկի, որ օմանցիները հանդես գան որպես միջնորդ երկրների միջև, ինչպես դա եղել է նախկինում։
ԱՄՆ երկու պաշտոնյաներն էլ ասել են, որ որոշում չի կայացվել, ներքին քննարկումները շարունակվում են:
«Նամակների փոխանակումից հետո մենք այժմ ուսումնասիրում ենք իրանցիների հետ բանակցություններ սկսելու և վստահություն ստեղծելու հաջորդ քայլերը»,- ասել է աղբյուրներից մեկը։
Երեքշաբթի Պենտագոնը հայտարարել էր, որ լրացուցիչ զորքեր և օդային միջոցներ է ուղարկում տարածաշրջան, և որ երկու ավիակիր՝ Թրումենն ու Վինսոնը, կմնան տարածաշրջանում։
Անցյալ շաբաթ Պենտագոնը մի քանի B-2 ռմբակոծիչներ է ուղարկել Հնդկական օվկիանոսում գտնվող Դիեգո Գարսիա ռազմաբազա։
B-2 ռմբակոծիչները կարող են կրել հսկայական բունկերային ռումբեր, որոնք առանցքային տարր կլինեն Իրանի ստորգետնյա միջուկային օբյեկտների դեմ ցանկացած հնարավոր ռազմական գործողության մեջ:
Ամերիկացի պաշտոնյան ասել է, որ Թրամփը չի ցանկանում պատերազմել Իրանի հետ, սակայն ռազմական միջոցների կարիք ունի՝ բանակցություններում զսպող ուժի դիրք հաստատելու համար, և պատրաստ լինի գործելու, եթե բանակցությունները ձախողվեն ու իրադարձություններն արագ սրվեն:
Թարգմանությունը՝ Էմմա Չոբանյանի
