24.06.2026 | 19:47
«Մինչև գումարի հարցը չլուծվի՝ դուրսգրում չի լինի». հայրը ահազանգում է, հիվանդանոցը՝ հերքում
Թրամփը «շատ զայրացած է» Պուտինի վրա և սպառնում է ՌԴ նավթի ոլորտին ուղղված նոր պատժամիջոցներով
Քաղաքականություն
31.03.2025 | 00:13
ԱՄՆ նախագահ Դոնալդ Թրամփը հայտարարել է, որ «շատ զայրացած է» Ռուսաստանի առաջնորդ Վլադիմիր Պուտինի վրա։ Մասնավորապես, NBC-ից Քրիստեն Ուելքերն ասել է, որ Թրամփը զանգահարել է իրեն՝ արտահայտելու իր զայրույթն այն բանի համար, որ Պուտինը կասկածի տակ է դնում Ուկրաինայի նախագահ Վլադիմիր Զելենսկիի՝ որպես առաջնորդի ապագան, գրում է France 24-ը։
«Եթե Ռուսաստանը և ես չկարողանանք գործարք կնքել Ուկրաինայում արյունահեղությունը դադարեցնելու վերաբերյալ, և եթե մտածեմ, որ դա Ռուսաստանի մեղքն է, ապա երկրորդական մաքսատուրքեր սահմանեմ Ռուսաստանից դուրս եկող ամբողջ նավթի համար»,- ըստ Ուելքերի՝ ասել է Թրամփը։
Ուելքերը նշել է, որ Թրամփն իրեն ասել է՝ «շատ զայրացած է» Պուտինի՝ Զելենսկիի հեղինակության վերաբերյալ վերջին մեկնաբանությունների և Ուկրաինայում նոր ղեկավարության մասին խոսակցությունների համար:
Թրամփը NBC-ին ասել է, որ Պուտինը գիտի, որ ինքը զայրացած է, բայց հավելել է, որ նրա հետ «շատ լավ հարաբերություններ ունի», և «զայրույթն արագորեն կցրվի, եթե ՌԴ նախագահը ճիշտ վարվի»:
Բացատրելով երկրորդական մաքսատուրքերի սպառնալիքը՝ Թրամփը NBC-ին ասել է, որ «եթե նավթ է գնվում Ռուսաստանից, ապա բիզնես անել Միացյալ Նահանգներում հնարավոր չի լինի»:
«Ամբողջ նավթի վրա սահմանվելու է 25 տոկոս մաքսատուրք»,- ասել է ԱՄՆ նախագահը։
Նա նաև նշել է, որ հաջորդ շաբաթ պատրաստվում է կրկին խոսել Պուտինի հետ։
Թարգմանությունը՝ Էմմա Չոբանյանի
