30.03.2025 | 17:44
Խախտումներ ընտրատեղամասում, որտեղ քվեարկել է Վարդան Ղուկասյանը. ՏԵՍԱՆՅՈՒԹ
Թուրքիայի ընդդիմության առաջնորդն այցելել է բանտում գտնվող Էքրեմ Իմամօղլուին
Քաղաքականություն
25.03.2025 | 18:25
Թուրքիայի գլխավոր ընդդիմադիր Ժողովրդահանրապետական կուսակցության (CHP) նախագահ Օզգյուր Օզելն այսօր Սիլիվրիի բանտում այցելել է կուսակցությունից նախագահի թեկնածու, Ստամբուլի կալանավորված քաղաքապետ Էքրեմ Իմամօղլուին։
«Որպես վերջին ընտրություններում հաղթած կուսակցության առաջնորդ՝ ես հենց նոր այցելեցի Էքրեմ Իմամօղլուին, որն ընտրվել է աշխարհի ամենահայտնի մեգապոլիսի քաղաքապետ, 3 անգամ ստացել է վստահության քվե։ Ես ամաչում եմ Թուրքիան կառավարողների փոխարեն այն մթնոլորտի համար, որում մենք հայտնվել ենք և այն իրավիճակի համար, որում հայտնվել է Թուրքիան»,- հայտարարել է Օզելը։
Նա հավելել է, թե իշխանությունները կարծում էին՝ «չեն կարողանա հաղթել Իմամօղլուին, հետո կազատվեն նրանից», բայց դա այնքան էլ հեշտ չէ։ Ըստ Օզելի՝ կուսակցության փրայմերիզում Իմամօղլուի օգտին 15 միլիոն մարդ է քվեարկել։
«Մարտի 19-ի քաղաքացիական հեղաշրջման փորձը կանխվեց հեղաշրջման կազմակերպիչների դեմ ոտքի ելած ժողովրդի կողմից»,- ասել է նա։
Բացի այդ, Օզելն այսօր մի շարք հայտարարություններ է արել Ստամբուլի «Բեշիքթաշ Մուստաֆա Քեմալ» մշակութային կենտրոնում կայացած իր կուսակցության խմբի նիստում։
«Մարտի 19-ի անհաջող հեղաշրջման փորձի դեմ մեր դիմադրության յոթերորդ օրն է։ Յոթ օր շարունակ Թուրքիան հրապարակներում ու փողոցներում բողոքում է դավադրության դեմ, միլիոնավոր մարդիկ ցույց են տալիս իրենց արձագանքը։ Մենք հավաքվում ենք հրապարակներում, բայց հանրահավաքներ չենք անում։ Մենք դիմադրում ենք հեղաշրջմանը, օգտվում ենք դիմադրելու մեր իրավունքից»,- ասել է ընդդիմադիր կուսակցության ղեկավարը։
Թարգմանությունը՝ Էմմա Չոբանյանի
