05.04.2026 | 17:21
Կալինինգրադում առևտրի կենտրոնում բռնկված հրդեհի տարածքը հասել է 1000 քառակուսի մետրի
Հայաստանն ու Ադրբեջանը քննարկել են ԴՆԹ համեմատության անկախ մեխանիզմ ներդնելու առաջարկը․ ԱԱԾ
Քաղաքականություն
25.03.2025 | 13:42
Հայաստանի և Ադրբեջանի գերիների, պատանդների և անհետ կորած անձանց հարցերով զբաղվող միջգերատեսչական հանձնաժողովների փետրվարի 7-ին տեղի ունեցած հանդիպման ժամանակ քննակել են ԴՆԹ համեմատության անկախ մեխանիզմ ներդնելու վերաբերյալ Անհետ կորած անձանց հարցերով միջազգային հանձնաժողովի ներկայացված առաջարկը։ Այս մասին Factor.am-ի գրավոր հարցմանն ի պատասխան հայտնել են Ազգային անվտանգության ծառայությունից։
Կառույցից միևնույն ժամանակ փոխանցել են, որ դրա արդյունավետ իրագործումը կախված է իրավական, տեխնիկական, կազմակերպչական բազմաթիվ գործոններից։
«Հարցի վերաբերյալ կողմերը դեռևս դիրքորոշում չեն արտահայտել և հարցը մնում է բաց՝ հետագա քննարկման հնարավորությամբ»,- նշված է ԱԱԾ-ի պատասխանում։
Նշենք՝ Անհայտ կորածների հարցերով միջազգային հանձնաժողովի՝ Հայաստանի և Ադրբեջանի վերաբերյալ զեկույցներում ասվում է, որ հանձնաժողովը Երևանին և Բաքվին առաջարկել է անհետ կորածների հարցով Հայաստանի և Ադրբեջանի միջև ԴՆԹ համեմատության անկախ մեխանիզմ ներդնել։
Հիշեցնենք, որ փետրվարի 7-ին տեղի է ունեցել գերիների, պատանդների և անհետ կորած անձանց հարցերով զբաղվող միջգերատեսչական հանձնաժողովների հանդիպումը։
Հայկական կողմից այդ հանդիպմանը մասնակցած ԱԱԾ տնօրեն Արմեն Աբազյանն օրեր առաջ ԱԺ-ում լրագրողների հետ ճեպազրույցում որոշ մանրամասներ էր ներկայացրել։
Նա ընդգծել էր, որ արվում է ամեն ինչ, որպեսզի հաջորդ հանդիպումը կայանա, և դրա արդյունքում արձանագրված կետերը, որոնք հուզում են անհետ կորածների և գերեվարվածների ծնողներին ու հարազատներին, ստանան իրենց պատասխանները։
ԱԱԾ տնօրենը նաև ասել էր, որ չի կարող հստակ ժամկետներ նշել աճյունների տեղափոխման և գերիների վերադարձի վերաբերյալ։
«Չեմ ուզում շտապել և որևէ տրամադրություն շոշափել, բայց դուք համոզված եղեք, որ հայկական կողմն ամեն ինչ անելու է, որպեսզի մենք այդ ուղղությամբ անպայման հաջողություն ունենանք»,- եզրափակել էր Արմեն Աբազյանը։
Մանյա Պողոսյան
