30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
Օդեսան և Զապորոժիեն ռուսական զանգվածային հարձակման են ենթարկվել․ վիրավորներ կան
21.03.2025 | 13:33
Ռուսական ուժերը մարտի լույս 21-ի գիշերը անօդաչու թռչող սարքերով հարվածներ են հասցրել ուկրաինական Օդեսային և Զապորոժիեին։ Կան վիրավորներ, այդ թվում՝ երեխաներ, հայտնում են տեղական իշխանությունները, գրում է Current time-ը։
Օդեսայի քաղաքապետ Գենադի Տրուխանովը հայտնել է, որ պայթյուններ են լսվել քաղաքի հարավային թաղամասերում։ Հաղորդվում է, որ Օդեսայում ավելի քան 15 պայթյուն է հնչել։
Ուկրաինայի նախագահի գրասենյակի ղեկավար Անդրեյ Երմակը հայտարարել է, որ ռուսական բանակը կրկին հարձակվել է քաղաքացիական ենթակառուցվածքների վրա, կան տուժածներ։
Օդեսայի վրա ռուսական զանգվածային հարձակման հետևանքով երեք դեռահաս է վիրավորվել, հայտնել է Ուկրաինայի արտակարգ իրավիճակների պետական ծառայությունը։
«Ռուսաստանը կրկին հարձակվել է Օդեսայի շրջանի վրա, վնասվել են քաղաքացիական ենթակառուցվածքները, բռնկվել են լայնածավալ հրդեհներ, այրվել են առևտրի կենտրոն և խանութներ, վնասվել է բազմահարկ շինություն։ Ըստ նախնական տեղեկությունների՝ երեք դեռահաս է տուժել»,- ասվում է հայտարարության մեջ։
Հաղորդվում է, որ ևս վեց մարդ վիրավորվել է Զապորոժիեի շրջանի բնակեցված շրջանների վրա կառավարվող ավիառումբերի հարվածի հետևանքով։ Վիրավորների թվում երեխա կա, հրդեհվել են բնակելի շենքեր։
Բացի այդ, անցած 24 ժամվա ընթացքում Խերսոնի շրջանում ռուսական հարվածների հետևանքով մեկ մարդ է զոհվել, երեքը՝ վիրավորվել, հայտնել է շրջանային վարչակազմի ղեկավար Ալեքսանդր Պրոկուդինը։
Թարգմանությունը՝ Էմմա Չոբանյանի
