07.11.2026 | 17:30
Ծանրորդ Էմմա Պողոսյանն աշխարհի առաջնությունում 8-րդն է
Թուրքիան դատապարտում է Գազայում Իսրայելի հարվածներն ու միջազգային հանրությանն արձագանքի կոչ է անում
Քաղաքականություն
18.03.2025 | 21:44
Իսրայելը մարտահրավեր է նետում ամբողջ մարդկությանը և լրջորեն խախտում է միջազգային իրավունքն ու համամարդկային արժեքները: Այս մասին ասվում է Թուրքիայի ԱԳՆ-ի հայտարարության մեջ՝ կապված Գազայի հատվածում իսրայելական ռազմական գործողությունների վերսկսման հետ։
Նշվում է, որ Իսրայելի կողմից Գազայի հատվածում հարյուրավոր պաղեստինցիների սպանությունը վկայում է, որ «Իսրայելի վարչապետ Բենիամին Նեթանյահուի կառավարության ցեղասպան քաղաքականությունը նոր փուլ է մտել»։
«Այն ժամանակ, երբ աճում է գլոբալ ճնշումը խաղաղության և կայունության համար, Իսրայելի կառավարության ցուցաբերած ագրեսիվ դիրքորոշումը սպառնում է տարածաշրջանի ընդհանուր ապագային։ Անընդունելի է, որ Իսրայելը տարածաշրջանը բռնության նոր փուլի մեջ ներքաշի»,- ասվում է հայտարարության մեջ:
Անկարան հայտարարում է նաև Իսրայելի դեմ միջազգային հանրության վճռական դիրքորոշման անհրաժեշտության մասին՝ Գազայի հատվածում երկարաժամկետ զինադադար ապահովելու և մարդասիրական օգնություն հասցնելու համար։
«Թուրքիան ևս մեկ անգամ ընդգծում է, որ կշարունակի աջակցել Պաղեստինի ժողովրդին իր արդար գործում, ինչպես նաև տարածաշրջանում խաղաղության և կայունության ապահովմանն ուղղված ջանքերին»,- նշվում է հայտարարության մեջ։
Թարգմանությունը՝ Էմմա Չոբանյանի
