30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
Ռուբեն Վարդազարյանի գործով դատավճիռը չհրապարակվեց. դատարանը վերսկսեց գործի քննությունը․ ՏԵՍԱՆՅՈՒԹ
Հասարակություն
18.03.2025 | 14:22
Հակակոռուպցիոն դատարանը՝ նախագահությամբ դատավոր Վահե Դոլմազյանի, այսօր պետք է հրապարակեր ԲԴԽ նախկին նախագահ Ռուբեն Վարդազարյանի գործով դատավճիռը, սակայն Վահե Դոլմազյանը, խորհրդակցական սենյակից վերադառնալով, հայտնեց, որ որոշել է վերսկսել գործի քննությունը: Դատավորը հայտնեց, որ վերսկսելու որոշումը, ի թիվս այլնի, կապված է վկա Անդրանիկ Սիմոնյանի ցուցմունքի հետ: Նշենք, որ Սիմոնյանն ԱԱԾ պետի տեղակալն է և Վարդազարյանի դեմ ցուցմունք տված անձը: Վկայի կարգավիճակ ունենալով և գործով դատակոչված լինելով՝ նա չի ներկայացել դատարան:
Հիշեցնենք, որ Վարդազարյանը մեղադրվում է արդարադատության իրականացմանը միջամտելու մեջ: Ըստ քրեական գործի` նա, ԲԴԽ նախագահը լինելով, Լոռու մարզի ընդհանուր իրավասության դատարանի դատավոր Անդրանիկ Սիմոնյանին հորդորել, խնդրել է կալանքի տակ գտնվող քրեական հեղինակություն «Ալավերդցի Վահագնի»` Վահագն Աբգարյանի խափանման միջոցը փոխել ազատազրկման հետ չկապված խափանման միջոցով։ Վարդազարյանի դեմ հաղորդումը ներկայացրել է Սիմոնյանը՝ իրավապահներին ներկայացնելով մի ձայնագրություն, որում, նրա պնդմամբ, խոսում են ինքն ու Վարդազարյանը: Սիմոնյանի հաղորդումից հետո նա նշանակվել է ԱԱԾ պետի տեղակալ:
Վարդազարյանի նկատմամբ քրեական հետապնդում հարուցվելուց հետո ԲԴԽ նախագահի պարտականությունները կատարել է ԲԴԽ անդամ Գագիկ Ջհանգիրյանը:
Քրեական գործի քննության ընթացքում հրապարակվել է մի ձայնագրություն, որում Գագիկ Ջհանգիրյանը Վարդազարյանին հորդորում է հրաժարական տալ ԲԴԽ նախագահի պաշտոնից` փոխարենը խոստանալով այնպես անել, որ Վարդազարյանի վերաբերյալ գործը կարճվի:
Այս գործը դատարան է ուղարկել 2021 թվականի սեպտեմբերին և մակագրվել Երևանի քրեական դատարանի դատավոր Գնել Գասպարյանին, սակայն մինչև 2022-ի հուլիս Գասպարյանը գործով դեռևս նախապատրաստական փուլում էր։ 2022 թվականի հուլիսին ստեղծվեց Հակակոռուպցիոն դատարանը։ Հուլիսի 1-ից ուժի մեջ մտած Քրեական դատավարության օրենսգրքով էլ սահմանվում էր, որ ընդհանուր իրավասության քրեական դատարաններում քննվող կոռուպցիոն բնույթի այն գործերը, որոնք հուլիսի 1-ի դրությամբ չէին մտել դատաքննության փուլ, ուղարկվում են Հակակոռուպցիոն դատարան։
Այսպիսով՝ Վարդազարյանի գործը ևս ուղարկվել է Հակակոռուպցիոն դատարան և մակագրվել դատավոր Վահե Դոլմազյանին։ Վարդազարյանն իրեն առաջադրված մեղադրանքը չի ընդունել։
Արաքս Մամուլյան
