27.04.2026 | 15:10
ՀՀ-Ադրբեջան սահմանազատումը կշարունակվի // Բերման է ենթարկվել հետախույզ Արթուր Ավանեսյանը․ ԼՈՒՐԵՐ
«Արմավիր» ՔԿՀ-ի 5 դատապարտյալներ անժամկետ հացադուլ են հայտարարել. դատավորի սխալի պատճառով պատժաչափն ավելացվել է
Հասարակություն
14.03.2025 | 20:43
«Արմավիր» քրեակատարողական հիմնարկում 5 դատապարտյալներ երեկվանից անժամկետ հացադուլ են հայտարարել։ Նրանցից չորսն աջակցություն են հայտնում հացադուլի մեջ գտնվող 5-րդ կալանավորին՝ Հարություն Մուրադյանին, որը դեռևս 2024 թվականի նոյեմբերի վերջից պետք է ազատության մեջ լիներ։
Factor TV-ի հետ զրույցում Քրեակատարողական ծառայությունից հաստատեցին հացադուլավորների պահանջը։
«Երեկվանից հացադուլի մեջ գտնվող անձինք, հանուն օրինական դատավճռի, աջակցություն են հայտնում կալանավոր Հարություն Մուրադյանին»,- նշեց ՔԿԾ լրատվության և հասարակայնության բաժնի պետ Նոնա Նավիկյանը։
Դեռևս հունվարին Factor TV-ն մանրամասն անդրադարձել էր Հարություն Մուրադյանի գործին։ Կալանավորը երկրորդ անգամ է դիմում ծայրահեղ քայլ հացադուլի, առաջին անգամ տարեսկզբին Մուրադյանը նախ ինքնավնասման, ապա հացադուլի միջոցով փորձել էր ուշադրություն հրավիրել իր գործին։
Կալանավորի պատմելով՝ 2024-ի նոյեմբերի վերջին ինքն արդեն ազատության մեջ պետք է լիներ, բայց դատավորի սխալի պատճառով ստիպված կալանավայրում պետք է անցկացնի ևս երկու տարի՝ մինչև 2026 թվականի դեկտեմբեր։ Ասում է՝ պատճառը դատարանի միտումնավոր սխալն է կամ անփութությունը։
Հափշտակության հոդվածով դեռևս 2019 թվականի նոյեմբերից կալանքի տակ գտնվող Մուրադյանին այլ հանցանք կատարելու համար էլ է մեղադրանք առաջադրվել, բայց համակցված պատժաչափ նշանակելու ընթացքում կալանքի տակ գտնվելու ժամկետի մասին հաստատականն ուշ են ուղարկել ՔԿՀ։
Հարություն Մուրադյանը երեք տարբեր գործերով եղել է ամբաստանյալի աթոռին։ Ըստ Datalex դատական տեղեկատվական համակարգի՝ առաջին դատական ակտը կայացրել է Երևանի ընդհանուր իրավասության դատարանի դատավոր Վարդան Գրիգորյանը՝ 2019 թվականի հունիսին՝ Մուրադյանին դատապարտելով 2 տարի 6 ամիս ժամկետով ազատազրկման։ Վերադաս ատյաններն անփոփոխ են թողել դատավճիռը, և այն ուժի մեջ է մտնել 2020 թվականի մայիսի 5-ին։ Սակայն այդ դատավճիռն ի կատար ածելու հաստատականը, որն ուղարկվում է դատարանի կողմից ՔԿՀ, գրեթե 3 տարի չի ստացվել և, Մուրադյանի խոսքով, տեղ է հասել միայն իր դիմումից հետո, այն էլ՝ կալանքի տակ լինելու հաշվակցումը նշվել է ոչ թե 2020 թվականը, այլ հաստատականը տրամադրելու ամսաթիվը՝ 2022 թվականի մայիսը։
2020 թվականից կալանավորված Հարություն Մուրադյանը երկրորդ հանցանքի համար 2022 դեկտեմբերին դատապարտվում է ևս 2 տարվա ազատազրկման։ Կոտայքի մարզի ընդհանուր իրավասության դատարանի դատավոր Գոռ Շահբազյանը, գումարելով նախորդ պատժաչափին, վերջնական պատիժ է նշանակում 4 տարի ազատազրկումը՝ կալանքի հաշվակցումը սկսելով ոչ թե 2020, այլ 2022 թվականից։ Ստացվում է՝ դատարանի անփութության պատճառով կալանավորը դեռևս անազատության մեջ պետք է անցկացնի։
Ուշագրավ է, որ հունվարի վերջին՝ Factor TV-ի ահազանգից հետո, դատավոր Վարդան Գրիգորյանը թեև նշում էր, որ ինքը ժամանակին է կատարողականն ուղարկել ՔԿՀ, այնուամենայնիվ, մեր հարցին ի պատասխան խոստացել էր՝ դատավոր Շահբազյանի հետ կփորձեն վրիպակն ուղղել։ Սակայն, փաստացի, մեկուկես ամիս անց գործով որևէ տեղաշարժ չի եղել, Մուրադյանը շարունակել է անազատության մեջ մնալ, ուստի նա անժամկետ հացադուլ է հայտարարել, ինչին միացել են ևս չորս կալանավորներ և դատապարտյալներ։
Խնդրի հետ կապված Factor TV-ն հարցումներ է ուղարկել Գլխավոր դատախազություն և Դատական դեպարտամենտ, պատասխան ստանալու դեպքում կհրապարակենք այն։
Ռոզա Վարդանյան
