19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Իրանը, Չինաստանը և ՌԴ-ն «բոլոր անօրինական պատժամիջոցները» վերացնելու կոչ են արել
Քաղաքականություն
14.03.2025 | 22:48
Իրանի, Չինաստանի և ՌԴ դիվանագետները Պեկինում կայացած հանդիպման ժամանակ մտքեր են փոխանակել իրանական միջուկային ծրագրի և ընդհանուր հետաքրքրություն ներկայացնող այլ միջազգային հարցերի շուրջ, գրում է Irna գործակալությունը։
Համատեղ հայտարարության մեջ նրանք ընդգծել են «բոլոր անօրինական, միակողմանի պատժամիջոցների վերացման անհրաժեշտության» մասին։
Հանդիպմանը, որը վարել է Չինաստանի փոխարտգործնախարար Մա Չժաոսուն, մասնակցել են Իրանի փոխարտգործնախարար Քազեմ Ղարիբաբադին և ՌԴ փոխարտգործնախարար Սերգեյ Ռյաբկովը։ Երկրների ներկայացուցիչները նշել են, որ շահագրգիռ կողմերը պետք է պարտավորվեն լուծել ներկա իրավիճակի հիմնական պատճառները և զերծ մնան պատժամիջոցներից, ճնշումներից կամ ուժի սպառնալիքներից: Նրանք ընդգծել են, որ «փոխադարձ հարգանքի» վրա հիմնված երկխոսությունը հարցի միակ գործնական լուծումն է՝ կոչ անելով «համապատասխան կողմերին ձեռնպահ մնալ ցանկացած գործողությունից, որը կսրի իրավիճակը և կխաթարի դիվանագիտական ջանքերը»։
Պեկինը և Մոսկվան նաև ողջունել են Իրանի հայտարարությունն այն մասին, որ իր միջուկային ծրագիրն ուղղված է բացառապես խաղաղ նպատակների, այլ ոչ թե միջուկային զենք արտադրելուն, ինչպես նաև Միջուկային զենքի չտարածման պայմանագրով և երաշխիքների համաձայնագրով նախատեսված իր պարտավորություններին ամբողջությամբ կատարելու Իրանի հանձնառությունը:
Հայտարարության մեջ նաև ընդգծվում է, որ միջուկային էներգիայի խաղաղ օգտագործման՝ Իրանի իրավունքը պետք է «լիովին» հարգվի։
Թարգմանությունը՝ Էմմա Չոբանյանի
