16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Անկարան պատրաստ է աջակցել Ուկրաինայի վերակառուցմանը․ Զելենսկին ընդունել է Թուրքիայի կառավարության և բիզնեսի ներկայացուցիչներին
Քաղաքականություն
14.03.2025 | 21:18
Թուրքիան պատրաստ է աջակցել Ուկրաինայի վերակառուցման ջանքերին և ընդլայնել տնտեսական ու առևտրային համագործակցությունը։ Այս մասին հայտարարել է Թուրքիայի առևտրի նախարար Օմեր Բոլաթը, գրում է Turkiye today-ը։
Նա թուրքական պատվիրակության հետ այցելել է Կիև, որտեղ նրանց ընդունել է Ուկրաինայի նախագահ Վլադիմիր Զելենսկին։ Հանդիպմանն անդրադարձ է եղել Թուրքիայի և Ուկրաինայի միջև տնտեսական և առևտրային հարաբերությունների ապագային, քննարկվել է հետագա համագործակցության ճանապարհային քարտեզը։
«Մենք վերահաստատեցինք մեր հանձնառությունը՝ հասնելու 10 միլիարդ դոլարի առևտրի ծավալի նպատակին, որը սահմանել էր պարոն Զելենսկին մեր նախագահի հետ միասին։ Մենք նաև մեր պատրաստակամությունն ենք հայտնել կյանքի կոչել մեր ազատ առևտրի համաձայնագիրը և Ուկրաինային փոխանցել թուրք կապալառուների փորձը վերակառուցման ջանքերում»,- ասել է Բոլաթը։
Նա նաև երախտագիտություն է հայտնել Զելենսկիին՝ Ուկրաինայի վերականգնման գործում ակտիվ դերակատարություն ունեցող Task Force-ի առաջին նիստը Կիևում անցկացնելուն աջակցելու համար։
«Բացի այդ, մենք վերահաստատել են մեր ամուր աջակցությունն Ուկրաինայի տարածքային ամբողջականությանը, անկախությանը և ինքնիշխանությանը, ընդգծել ենք երկխոսության կարևորությունը տարածաշրջանում խաղաղության և կայունության հաստատման համար»,- նշել է թուրք նախարարը։
Զելենսկին իր հերթին ընդգծել է Ուկրաինայում արդեն գործող թուրքական բիզնեսների նշանակությունը։
«Այսօր մենք քննարկել ենք արդար և կայուն խաղաղության մերձեցման ջանքերը, երկկողմ հարաբերությունների զարգացումը, տարբեր տեսակի անօդաչու սարքերի արտադրության ոլորտում համագործակցության հնարավորությունները և թուրքական ընկերությունների մասնակցությունը Ուկրաինայի վերակառուցմանը»,- գրել է Զելենսկին X-ի իր միկրոբլոգում։
Նա հավելել է, որ «Ուկրաինան Թուրքիային համարում է իր ռազմավարական գործընկերներից մեկը՝ ինչպես անվտանգության երաշխիքների, այնպես էլ առևտրի առումով, և պատրաստ է վավերացնել Թուրքիայի հետ ազատ առևտրի համաձայնագիրը նախագահ Ռեջեփ Թայիփ Էրդողանի առաջիկա այցի ընթացքում»։
Թարգմանությունը՝ Էմմա Չոբանյանի
