18.12.2025 | 10:05
Հունգարիայի առաջնության առաջատարը ցանկանում է ձեռք բերել Հայաստանի հավաքականի դարպասապահին
Մոսկվան և Մոսկվայի մարզը կրկին ԱԹՍ-ների զանգվածային հարձակման են ենթարկվել, Տուապսեի նավթավերամշակման գործարանում հրդեհ է․ ՏԵՍԱՆՅՈՒԹ
Քաղաքականություն
14.03.2025 | 12:34
ՌԴ մի շարք բնակավայրեր, այդ թվում՝ Մոսկվան և Մոսկվայի մարզը մարտի լույս 14-ի գիշերը կրկին անօդաչու թռչող սարքերի հարձակման են ենթարկվել, գրում է Current time-ը։
Մասնավորապես, Կրասնոդարի երկրամասում ԱԹՍ-ների բեկորների անկման հետևանքով մասշտաբային հրդեհ է բռնկվել «Ռոսնեֆտ»-ին պատկանող Տուապսեի նավթավերամշակման գործարանում։ Տուապսեի շրջանի ղեկավար Սերգեյ Բոյկոն հաստատել է հրդեհի մասին տեղեկությունը։
Հրդեհի մակերեսը կազմում է ավելի քան հազար քառակուսի մետր։ Բոյկոն հայտնել է, որ հրդեհը կարող է տարածվել հարևան ջրամբարների վրա, և այն մարելու համար ներգրավված է 39 միավոր տեխնիկա։ Տեղի բնակիչները սոցիալական ցանցերում գրել են, որ գիշերը ժամը 3-ին լսել են Տուապսեի վրայով թռչող մի քանի անօդաչուի ձայն, որից հետո մոտ յոթ պայթյունի ձայն է լսվել։
Մոսկվայի քաղաքապետ Սերգեյ Սոբյանինը հայտարարել է, որ գիշերը հակաօդային պաշտպանության համակարգերը հետ են մղել ՌԴ մայրաքաղաքի ուղղությամբ չորս անօդաչու թռչող սարքերի հարձակումը։ Մոսկվայի մարզի նահանգապետ Անդրեյ Վորոբյովն էլ գրել է, որ նախնական տեղեկություններով՝ զոհեր և վիրավորներ չկան։
«Այսօր առավոտյան մեր ՀՕՊ-ը հետ է մղել հերթական անօդաչու թռչող սարքի հարձակումը: Բալաշիխայի վրա երկու անօդաչու թռչող սարք են խոցել, որոնցից մեկի բեկորներն ընկել են Իզմայիլովո միկրոշրջանում գտնվող շինհրապարակում: Եվս մեկ անօդաչու թռչող սարք ոչնչացվել է Ժելեզնոդորոժնի միկրոշրջանում։ Երրորդ անօդաչու թռչող սարքը խոցվել է Յուժնայա Բիցա միկրոշրջանում, բեկորներն ընկել են նորակառույց բազմահարկ շենքի վրա, որտեղ դեռ ոչ ոք չի ապրում»,- նշել է նա։
Հաղորդվում է, որ Մոսկվայի «Վնուկովո» օդանավակայանը դադարեցրել է թռիչքների ուղարկումն ու ընդունումը, յոթ ինքնաթիռներ ուղղորդվել են այլ օդանավակայաններ։ Նմանատիպ սահմանափակումներ են մտցվել Կալուգայի «Գրաբցևո» օդանավակայանում։ Կալուգայի շրջանի նահանգապետ Վլադիսլավ Շապշան հայտնել է, որ հակաօդային պաշտպանության ուժերը Օբնինսկում անօդաչու թռչող սարք են ոչնչացրել։
Հիշեցնենք, որ մարտի 11-ին Մոսկվան և Մոսկվայի մարզը ԱԹՍ-ների զանգվածային հարձակման էին ենթարկվել։
Թարգմանությունը՝ Էմմա Չոբանյանի
