Զանգվածային հարձակում Մոսկվայի և Մոսկվայի մարզի վրա․ զոհ և վիրավորներ կան․ ՏԵՍԱՆՅՈՒԹ

Ուկրաինական անօդաչուները հարձակվել են Մոսկվայի և Մոսկվայի մարզի վրա մարտի լույս 11-ի գիշերը։ Այս մասին հայտնել է Մոսկվայի քաղաքապետ Սերգեյ Սոբյանինը, փոխանցում է Meduza-ն։

Նրա տեղեկացմամբ՝ առավոտյան ժամը 08:45-ի դրությամբ՝ ռուսական հակաօդային պաշտպանության ուժերը խոցել են 74 ուկրաինական անօդաչու թռչող սարք, որոնք թռչում էին դեպի Մոսկվա: Քաղաքապետն ասել է, որ սա ուկրաինական անօդաչու թռչող սարքերի ամենազանգվածային հարձակումն է Մոսկվայի վրա։

Սոբյանինը հայտնել է, որ Մոսկվայի հարավում գտնվող Դոմոդեդովսկայա փողոցում շենքի տանիքը «մի փոքր» վնասվել է կործանված անօդաչու թռչող սարքի ընկնելու պատճառով։ Անօդաչու թռչող սարքի բեկորներ են հայտնաբերվել Մոսկվայի Կապոտնյա շրջանում։

Մոսկվայի մարզում (Մերձմոսկվայում) մեկ մարդ է մահացել, երեքը վիրավորել են, հայտնել է նահանգապետ Անդրեյ Վորոբյովը Telegram-ի իր ալիքում։

Baza Telegram ալիքն էլ հայտնում է, որ  հարձակման հետևանքով վիրավորվել է ութ մարդ, այդ թվում՝ երկու երեխա։ Յոթ մարդ, այդ թվում՝ երեխաներ, հոսպիտալացվել են։ Baza-ի տեղեկություններով՝ Մոսկվայի մարզի Դոմոդեդովո շրջանի «Միրատորգ» ավտոկայանատեղիում անվտանգության աշխատակից է մահացել։

«Ռոսավիացիա»-ն ժամանակավոր սահմանափակումներ է մտցրել Մոսկվայի «Շերեմետևո», «Վնուկովո», «Դոմոդեդովո» և «Ժուկովսկի» օդանավակայաններում՝ անօդաչու սարքերի հարձակումների պատճառով։ Սամարայի օդանավակայանն ընդունել է 10 չվերթ դեպի Մոսկվա։

Անօդաչու թռչող սարքի բեկորների անկման հետևանքով վնասվել է «Դոմոդեդովո» կայարանի երկաթուղային ենթակառուցվածքը, ինչը խափանումներ է առաջացրել մերձքաղաքային գնացքների չվացուցակում։

Մարտի 11-ի առավոտից Մոսկվայի շրջանի հարավային և հարավ-արևելյան մի քանի քաղաքների բնակիչներ հայտնել են պայթյունների մասին՝ Ռամենսկոե, Սերպուխովա, Կաշիրա, Կոլոմնա, Վոսկրեսենսկի և Դոմոդեդովո:

ՌԴ ՊՆ-ն էլ հայտարարել է, որ գիշերը ռուսական հակաօդային պաշտպանության համակարգերը որսացել և ոչնչացրել են 337 ուկրաինական անօդաչու թռչող սարք, որոնցից 91-ը՝ Մոսկվայի շրջանի, 126-ը՝ Կուրսկի շրջանի վրա։ Բացի այդ, Բելգորոդի մարզում խոցվել է 25 անօդաչու թռչող սարք, Ռյազանում՝ 22, Կալուգայի շրջանում՝ 10, Լիպեցկի և Օրյոլի շրջաններում՝ ութը, Վորոնեժում՝ վեցը, Նիժնի Նովգորոդում՝ երեքը։ Լիպեցկի մարզում մեկ մարդ տուժել է Ստանովլյանսկի շրջանի M-4 մայրուղու վրա անօդաչու թռչող սարքի անկման հետևանքով։

Սա ուկրաինական անօդաչու թռչող սարքերի ամենազանգվածային հարձակումն է ռուսական շրջանների վրա ռուս-ուկրաինական լայնածավալ պատերազմի ընթացքում։

Թարգմանությունը՝ Էմմա Չոբանյանի