19.02.2026 | 21:27
Երևանի 3 վարչական շրջանում փոշու պարունակությունը գերազանցել է սահմանային թույլատրելի կոնցենտրացիան
Զելենսկին բացատրել է, թե ինչու է Ուկրաինան համաձայնել 30-օրյա հրադադարին
Քաղաքականություն
12.03.2025 | 18:32
Ուկրաինան համաձայնել է իր ամբողջ տարածքում 30-օրյա հրադադարի մասին ԱՄՆ առաջարկին։ Այս որոշումը կայացվել է՝ ցույց տալու համար, որ Ուկրաինան պատրաստ է խաղաղության, ճեպազրույցում հայտարարել է Ուկրաինայի նախագահ Վլադիմիր Զելենսկին, գրում է ՌԲԿ Ուկրաինան։
Նա նշել է, որ մինչ Սաուդյան Արաբիայում Ուկրաինայի և ԱՄՆ-ի հանդիպումը խոսվել է օդում և ծովում հրադադար առաջարկելու մասին։ Բայց հետո ամերիկյան կողմն այլ մոտեցում է առաջարկել։ Ըստ նրա՝ հանդիպման կեսին իր հետ կապվել է ուկրաինական թիմը, իսկ ԱՄՆ կողմը՝ նախագահ Դոնալդ Թրամփի հետ, և հարց բարձրացրել՝ արդյո՞ք Կիևը պատրաստ է քայլեր ձեռնարկել ամբողջ տարածքում հրադադար ապահովելու համար։
«Ես սա բազմիցս ընդգծել եմ, մեզանից ոչ ոք չի վստահում ռուսներին, մենք անցել ենք դրա միջով, բայց մենք չենք խաղալու այն նարատիվների հետ, որ չենք ուզում՝ պատերազմն ավարտվի։ Ես շատ լուրջ եմ և ինձ համար կարևոր է պատերազմի ավարտը, ես ուզում եմ, որ ԱՄՆ նախագահը տեսնի դա, որպեսզի Եվրոպան, բոլորը, դաշինքի մեջ լինեն, որպեսզի Ռուսաստանի Դաշնությանը ստիպեն դադարեցնել պատերազմը։ Ուստի իմ արձագանքն այն էր, որ մենք պատրաստ ենք 30-օրյա լռության այն ձևաչափով, որը մեզ առաջարկել է ամերիկյան կողմը»,- պարզաբանել է Զելենսկին։
Եթե Ռուսաստանը մերժի Ջիդդայում ուկրաինական և ամերիկյան պատվիրակությունների հանդիպման ժամանակ մշակված առաջարկները, ապա ԱՄՆ-ից կարելի է ակնկալել ուժեղ քայլեր Մոսկվայի ուղղությամբ, ասել է նա։
«Ուժեղ քայլեր ռուսական կողմի նկատմամբ։ Ես հասկանում եմ, որ մենք կարող ենք հույս դնել ամուր քայլերի վրա։ Ես դեռ մանրամասներ չգիտեմ, բայց մենք խոսում ենք պատժամիջոցների և Ուկրաինայի ուժեղացման մասին։ Եթե ռուսները ցույց տան, որ պատրաստ են Ամերիկայի առաջարկին, ինչպես մենք՝ ոչ ավելի, ոչ պակաս, ապա համապատասխան որոշումներ կլինեն։ Եվ եթե նրանք պատրաստ չեն, ապա մենք իսկապես հույս ունենք, որ ամերիկյան կողմը կցուցադրի այն, ինչ ասել է»,- ասել է Վլադիմիր Զելենսկին։
Թարգմանությունը՝ Էմմա Չոբանյանի
