Թրամփի վարչակազմը պաշտոնական հրապարակումների «մաքրում» է սկսել․ հանվում են «ֆեմինիզմ», «անհավասարություն», «գենդեր» և «հակառասիզմ» բառերը

Դոնալդ Թրամփի՝ ԱՄՆ նախագահի պաշտոնը ստանձնելուց հետո ամերիկյան կառավարական մարմինները սկսել են վերաշարադրել տեքստերն իրենց կայքերում և պաշտոնական փաստաթղթերում՝ հեռացնելով դրանցից որոշ բառեր և արտահայտություններ: The New York Times-ի լրագրողները հայտնաբերել են 197 նման բառ և բառակապակցություն, փոխանցում է Meduza-ն։

Ցանկում ներառված են BIPOC (սև, բնիկ, գունավոր մարդիկ), DEI (բազմազանություն, հավասարություն, ընդգրկում) հապավումները և դրանց տարբերակները, ԼԳԲՏ-ն և դրա տարբերակները, Mx հապավումը (սեռային առումով չեզոք փոխարինում է «Պարոն», «Տիկին», «Միսս»), Latinx բառը (գենդերային չեզոք վերջավորություն իսպանական ծագում ունեցող անձի համար) և «Մեքսիկայի ծոց» անունը (Թրամփն այն վերանվանել է «Ամերիկյան ծոց»):

Նույն բառերը փնտրում են պետական դրամաշնորհների ու պայմանագրերի հայտերում, և դա կարող է ազդել դրանց քննարկման վրա: Հատուկ հուշագրեր և հրահանգներ «արգելված» բառերի ցուցակներն ուղարկվում են իրենց ենթականերին դաշնային կառավարման մարմինների ղեկավարների կողմից:

The New York Times-ի լրագրողները չեն կարողացան գտնել որևէ փաստաթուղթ, որի հիմքը լինեն այդ հուշագրերն ու հրահանգները: Որոշ դեպքերում, «արգելված» բառերի ցանկի փոխարեն, պաշտոնյաներին ուղղակի հրահանգ է տրվում չօգտագործել «անպատշաճ լեզու»։

Լրատվամիջոցն ընդգծում է, որ նման «լեզվային վերանայումներ» տեղի են ունենում Միացյալ Նահանգներում նախագահական վարչակազմի յուրաքանչյուր փոփոխության ժամանակ. նոր ղեկավարությունը միշտ ձգտում է պաշտոնական հռետորաբանությունը համապատասխանեցնել իր քաղաքական առաջնահերթություններին: Բայց հիմա մասշտաբներն աննախադեպ են։

The New York Times-ի լրագրողները պարզել են, որ ավելի քան 250 դաշնային կառավարության կայքերն արդեն փոխվել են նոր պահանջներին համապատասխանելու համար:

Թարգմանությունը՝ Էմմա Չոբանյանի