Ադրբեջանը բանտարկված լրագրողների թվով երկրորդն է Եվրոպայում․ առաջատարը Բելառուսն է

Եվրոպայի խորհրդի Լրագրության պաշտպանության և լրագրողների անվտանգության պլատֆորմը հրապարակել է «2024. Պայքար քաղաքական ճնշման, ապատեղեկատվության և ԶԼՄ-ների անկախության էրոզիայի դեմ» զեկույցը, որում ասվում է, որ Ադրբեջանը բանտարկված լրագրողների թվով Եվրոպայում զբաղեցնում է երկրորդ տեղը՝ Բելառուսից հետո, փոխանցում են ադրբեջանական լրատվամիջոցները։

Նշվում է, որ անցյալ տարվա դեկտեմբերի 31-ի դրությամբ՝ Եվրոպայում բանտարկված է եղել 159 լրագրող։ Բանտարկված լրագրողներից 44-ը Բելառուսում են, 30-ը՝ Ադրբեջանում, 29-ը՝ Ռուսաստանում (28-ը՝ Ռուսաստանի կողմից օկուպացված Ուկրաինայի տարածքներում), 27-ը՝ Թուրքիայում, մեկը՝ Վրաստանում։

Զեկույցում ընդգծվում է, որ Ադրբեջանում «Զանգվածային լրատվության մասին» օրենքը շարունակում է խեղդել մամուլի ազատությունը և շտապ վերանայման կարիք ունի։ Հաղորդվում է, որ լրագրողների անվտանգությանը և աղբյուրների գաղտնիությանը ևս մեկ լուրջ սպառնալիք են լրտեսող ծրագրերը։ Լրագրողների նկատմամբ հսկողությունը դարձել է համատարած։

Զեկույցի համաձայն՝ 2024 թվականին ուշադրության կենտրոնում են Վրաստանը, Իտալիան և Սլովակիան։ 2024 թվականին Վրաստանը Եվրոպայի խորհրդի անդամ բոլոր երկրներից գրանցել է մամուլի ազատության մասին նախազգուշացումների ամենաբարձր աճը։ Անցյալ տարի երկրում տեղի ունեցած ընտրությունների և դրան հաջորդած բողոքի ակցիաների ժամանակ տասնյակ լրագրողներ ենթարկվել են բռնությունների։

Զեկույցում նշվում է նաև լրագրող ադրբեջանցի ընդդիմադիր Աֆղան Սադիգովի ձերբակալությունը 2024 թվականի նոյեմբերին և նրան Ադրբեջանին արտահանձնելու որոշումը։

Ընդհանուր առմամբ, 2023 թվականի նոյեմբերից Ադրբեջանում մաքսանենգության մեղադրանքով կալանավորվել են շուրջ 30 լրագրողներ և հասարակական ակտիվիստներ։ Նրանցից ոչ ոք չի ընդունում մեղքը և իր ձերբակալությունը կապում է մասնագիտական ​​գործունեության ու քաղաքական պատվերների հետ։

Ըստ ադրբեջանցի իրավապաշտպանների՝ երկրում 331 քաղբանտարկյալ կա։

Թարգմանությունը՝ Էմմա Չոբանյանի