09.10.2026 | 15:58
Վերացնել կալանքը, դադարեցնել հետապնդումը․ Արթուր Դանիելյանի գործի առնչությամբ 11 ՀԿ-ներ հայտարարություն են տարածել
Թրամփը պատրաստվում է 240,000 ուկրաինացի փախստականների զրկել իրավական կարգավիճակից․ Reuters
Քաղաքականություն
06.03.2025 | 18:25
ԱՄՆ նախագահ Դոնալդ Թրամփի վարչակազմը ծրագրում է հետ կանչել 2022 թվականից հետո երկիր ժամանած շուրջ 240 հազար ուկրաինացի փախստականների իրավական կարգավիճակը։ Այս մասին գրում է Reuters-ը՝ հղում անելով աղբյուրներին։
Որոշումը, ըստ Reuters-ի աղբյուրների, սպասվում է ապրիլին, և դա կարող է հանգեցնել ուկրաինացիների արագացված արտաքսմանը։
Ուկրաինացի փախստականների համար ծրագրերի չեղարկումը սկսել է նախապատրաստվել դեռևս Ուկրաինայի նախագահ Վլադիմիր Զելենսկիի հետ Թրամփի հրապարակային վեճից առաջ։
Լրատվամիջոցի աղբյուրներն այդ քայլն անվանում են Թրամփի վարչակազմի ավելի լայն ջանքերի մի մասը՝ զրկելու շուրջ 1,8 միլիոն միգրանտների օրինական կարգավիճակից, որոնք մուտք են գործել երկիր նախկին նախագահ Ջո Բայդենի կողմից նախաձեռնված մարդասիրական ապաստան տրամադրելու ծրագրերի շրջանակում:
Նույն նախաձեռնության շրջանակում Թրամփի վարչակազմը նաև նախատեսում է մարտի սկզբին չեղարկել հումանիտար հիմքերը մոտ 530,000 կուբացիների, հաիթցիների, նիկարագուացիների և վենեսուելացիների համար։
ԱՄՆ Ներքին անվտանգության դեպարտամենտի խոսնակ Տրիսիա Մաքլաֆլինը հայտնել է, որ գործակալությունը մեկնաբանություններ չունի: Սպիտակ տունը և Ուկրաինայի դեսպանատունը չեն պատասխանել մեկնաբանությունների խնդրանքներին։
Թարգմանությունը՝ Էմմա Չոբանյանի
