17.07.2026 | 21:00
ՔՆՆԱՐԿՈւՄ․ Իսպանիա vs Արգենտինա․ Ֆուտբոլային մեծ բախում՝ Աշխարհի չեմպիոնի գավաթի համար․ ո՞ր թիմը կհաղթի․ ՏԵՍԱՆՅՈՒԹ
Թուրքիան և Ադրբեջանը տարածաշրջանում խաղաղության կողմնակից են. Էրդողան
Քաղաքականություն
05.03.2025 | 20:03
«Մեկ ազգ, երկու պետություն» կարգախոսով միավորված Թուրքիայի և Ադրբեջանի հարաբերությունները բոլոր ոլորտներում մեծ հաջողություններ են գրանցում, հարաբերությունները մշտապես զարգանում են տարբեր ոլորտներում՝ պաշտպանությունից մինչև առևտուր: Էներգետիկ ոլորտն էլ, որտեղ բազմաթիվ ծրագրեր են իրականացրել, այս համագործակցության առաջնագծում է։ Այս մասին հայտարարել է Թուրքիայի նախագահ Ռեջեփ Թայիփ Էրդողանը Ադրբեջանի նախագահ Իլհամ Ալիևի հետ տեսակապով Իգդիր-Նախիջևան գազատարի բացման արարողությանը մասնակցելուց հետո։
«Իգդիր-Նախիջևան գազատարը, որը բացում ենք, կամբողջացնի մեր նախկին ռազմավարական նախաձեռնությունները էներգետիկայի ոլորտում։ Սա նաև կդառնա Նախիջևանի հետ մեր միասնության խորհրդանիշը»,- ասել է Էրդողանը։
Նա հավելել է, որ այն Նախիջևանի բնական գազի բոլոր կարիքները կապահովի առնվազն 30 տարի։
«Այս առիթով ուզում եմ ասել՝ Թուրքիան և Ադրբեջանը խաղաղության, հանգստության և բարգավաճման կողմնակից են։ Մենք միայն խաղաղություն և համագործակցություն ենք ցանկանում մեր տարածաշրջանում, ցանկանում ենք միասին զարգանալ։ Այդ նպատակով մենք բազմաթիվ քայլեր ենք ձեռնարկել և դրսևորել ենք մեր անկեղծությունը։ Այսուհետ մենք վճռական ենք միասին իրականացնելու տարբեր ծրագրեր՝ ուղղված տարածաշրջանային խաղաղությանը, բարգավաճմանը և հանգստությանը»,- հայտարարել է Թուրքիայի նախագահը։
Թարգմանությունը՝ Էմմա Չոբանյանի
