10.08.2026 | 12:00
Ովքեր կդառնան ԱԺ մշտական հանձնաժողովների նախագահներ. քննարկում խորհրդարանում․ ՈՒՂԻՂ
Արաբական երկրները հաստատել են Գազայի վերականգման՝ 53 մլրդ դոլար արժեքով Եգիպտոսի ծրագիրը․ ԱՄՆ-ն ու Իսրայելը դեմ են
Քաղաքականություն
05.03.2025 | 18:26
Արաբական պետությունների լիգայի անդամ երկրների առաջնորդները երեքշաբթի հավանություն են տվել Գազայի հատվածի հետպատերազմյան ծրագրին, որը թույլ կտա շուրջ 2 միլիոն պաղեստինցիներին մնալ՝ ի հակակշիռ ԱՄՆ նախագահ Դոնալդ Թրամփի՝ տարածքն ամայացնելու և այն որպես ծովափնյա վայր վերակառուցելու ծրագրին, գրում է AP-ն։
Նշվում է, որ Կահիրեում կայացած գագաթնաժողովում արաբ առաջնորդների կողմից 53 միլիարդ դոլար արժողությամբ ծրագրի հաստատումը հավասարազոր էր Թրամփի առաջարկը մերժելուն: Գագաթնաժողովի ամփոփիչ եզրակացությունը ողջունվել է ՀԱՄԱՍ-ի կողմից, սակայն մերժվել է Իսրայելի և թույլ արձագանք ստացել՝ Թրամփի վարչակազմի կողմից:
Եգիպտոսի նախագահ Աբդել Ֆաթթահ ալ-Սիսին իր երախտագիտությունն է հայտնել «արաբական երկրների միջև կոնսենսուսի համար՝ աջակցելու Գազայի հատվածի վերականգնման ծրագրին, որը թույլ է տալիս պաղեստինյան ժողովրդին մնալ իր հողում առանց տեղահանումների»:
Սպիտակ տան Ազգային անվտանգության խորհրդի խոսնակ Բրայան Հյուզը մերժել է եգիպտական առաջարկը՝ այն համարելով անիրագործելի։
«Այդ առաջարկը չի անդրադառնում այն իրականությանը, որ Գազայի հատվածը ներկայում անբնակելի է, դրա բնակիչները չեն կարող մարդկայնորեն ապրել բեկորներով և չպայթած զինամթերքով պատված տարածքում։ Նախագահ Թրամփը պաշտպանում է Գազայի հատվածը ՀԱՄԱՍ-ից զերծ վերականգնելու իր տեսլականը: Մենք անհամբեր սպասում ենք հետագա բանակցություններին՝ տարածաշրջանին խաղաղություն և բարգավաճում բերելու համար»,- ասել է նա։
Իսրայելի ԱԳՆ խոսնակ Օրեն Մարմորշտեյնն էլ X-ում գրել է, որ եգիպտական ծրագիրը «չի կարող անդրադառնալ առկա իրողություններին»՝ հավելելով, որ գագաթնաժողովի համատեղ կոմյունիկեն չի հիշատակում 2023 թվականի հոկտեմբերի 7-ին ՀԱՄԱՍ-ի հարձակումը, որը պատերազմի բռնկման պատճառ է դարձել, նաև չի դատապարտում զինյալ խմբավորումը:
Ծրագիրը, նրա խոսքով, մնում է «արմատավորված հնացած հեռանկարներով»: Նա կրկնել է Իսրայելի աջակցությունը Գազայի բնակչությանն այլ տեղում վերաբնակեցնելու Թրամփի ծրագրին՝ նկարագրելով այն որպես «Գազայի բնակիչների համար ազատ ընտրության հնարավորություն՝ հիմնված նրանց ազատ կամքի վրա»:
Թարգմանությունը՝ Էմմա Չոբանյանի
