30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
Գերմանիայում մեկնարկել են կառավարական կոալիցիայի ձևավորման բանակցությունները
Քաղաքականություն
28.02.2025 | 17:50
Գերմանիայի պահպանողական CDU/CSU դաշինքը նախնական բանակցություններ է սկսել Սոցիալ-դեմոկրատների (SPD) հետ՝ ուղղված նոր կառավարական կոալիցիայի ձևավորմանը, գրում է DW-ն։
CDU/CSU դաշինքը կազմված է հավանական ապագա կանցլեր Ֆրիդրիխ Մերցի Քրիստոնեա-դեմոկրատական միությունից (CDU) և Բավարիայի քույր կուսակցությունից՝ Քրիստոնեա-սոցիալական միությունից (CSU):
Փետրվարի 23-ին Գերմանիայի դաշնային ընտրություններում պահպանողական դաշինքը զբաղեցրել էր առաջին տեղը՝ ստանալով ձայների մոտ 28,5%-ը։ Հեռացող կանցլեր Օլաֆ Շոլցի SPD-ն հավաքել է ընդամենը 16,4 տոկոս՝ կուսակցության համար պատմական նվազագույն ցուցանիշով:
Մերցը բացառել է կոալիցիայի կազմումը ծայրահեղ աջ «Այլընտրանք Գերմանիայի համար» (AfD) հետ, որը երկրորդ տեղում է 20,8%-ով։ Սպասվում է, որ այսօրվա բանակցությունները կկենտրոնանան կոալիցիոն բանակցությունների ժամանակացույցի սահմանման վրա: Դեռևս պարզ չէ, թե երբ կսկսվեն պաշտոնական բանակցությունները։
Մերցն ասել է, որ մտադիր է կառավարություն կազմել Սուրբ Զատիկից առաջ։
Թեև SPD-ն համաձայնել է բանակցությունների արագ մեկնարկին, կուսակցության համաղեկավար Լարս Քլինգբեյլն ընդգծել է, որ CDU/CSU-ի հետ կոալիցիան դեռևս չի կայացել: SPD-ն և CDU/CSU-ն բախվել են մի շարք տարաձայնությունների առանցքային հարցերի, այդ թվում՝ միգրացիայի, հարկային քաղաքականության և պետական ծախսերի շուրջ:
Թարգմանությունը՝ Էմմա Չոբանյանի
