07.10.2026 | 18:47
Անհրաժեշտության դեպքում խստացված հսկողություն կկիրառենք․ Ավանեսյանը՝ ՌԴ-ում ժանտախտի բռնկման մասին
Թուրքիան պատրաստ է Ուկրաինա խաղաղապահներ ուղարկել, սակայն պայման է առաջ քաշում
Քաղաքականություն
28.02.2025 | 15:54
Թուրքիան, որը ՆԱՏՕ-ի՝ մեծությամբ երկրորդ ռազմական տերությունն է ԱՄՆ-ից հետո, պատրաստ է զորքեր ներգրավել Ուկրաինայում հնարավոր խաղաղապահ առաքելության համար: Այս մասին Bloomberg-ին հայտնել են իրավիճակին ծանոթ աղբյուրները։
Թուրքիայի նախագահ Ռեջեփ Թայիփ Էրդողանն այս ամսվա սկզբին Անկարայում առանձին հանդիպումների ժամանակ քննարկել է այդ հարցը Ուկրաինայի նախագահ Վլադիմիր Զելենսկիի և Ռուսաստանի ԱԳ նախարար Սերգեյ Լավրովի հետ, հայտնել են բանակցություններին ծանոթ անձինք՝ անանունության պայմանով։
Նշվում է, որ առաջարկը համընկնում է Ուկրաինայում հրադադար ապահովելու շարունակական ջանքերի հետ, ծրագիր, որը պաշտպանում են ԱՄՆ նախագահ Դոնալդ Թրամփը և Ռուսաստանի նախագահ Վլադիմիր Պուտինը: Թուրքիայի այս մտադրությունը կարևոր նշանակություն ունի եվրոպացի դաշնակիցների բեռը թեթևացնելու համար, ներառյալ՝ Մեծ Բրիտանիայի և Ֆրանսիայի, որոնք պլաններ են մշակում Ուկրաինայի համար Եվրոպայի գլխավորած ուժեր ստեղծելու նպատակով։
Աղբյուրները, սակայն, նշել են, որ Թուրքիան չի լինի որևէ խաղաղապահ առաքելության մաս, քանի դեռ չի ներգրավվել դրա ձևավորման վերաբերյալ բոլոր խորհրդակցություններին և նախապատրաստական աշխատանքներին։
ՌԴ կառավարությանը մոտ կանգնած աղբյուրն էլ ասել է, որ Ռուսաստանը Թուրքիային պատասխան չի տվել Ուկրաինա ուժեր ուղարկելու հարցում, թեև Լավրովի հետ այդ թեման քննարկվել է վերջին այցի ժամանակ։ Աղբյուրը նշել է, որ այդ հարցն անմիջական առաջնահերթություն չի համարվում։
Թարգմանությունը՝ Էմմա Չոբանյանի
