Քաղաքականություն
27.02.2025 | 21:24
Թուրքիան առանցքային դեր է խաղում եվրոպական անվտանգության ճարտարապետության ցանկացած վերակառուցման գործում: Այս մասին հայտարարել է Թուրքիայի արտգործնախարար Հաքան Ֆիդանը Ալբանիայի ԱԳ նախարար Իգլի Հասանիի հետ Անկարայում կայացած համատեղ ասուլիսում, փոխանցում է Անադոլուն։
«Մի կողմից քայլեր են ձեռնարկվում Ուկրաինայում պատերազմը դադարեցնելու ուղղությամբ, իսկ մյուս կողմից՝ եվրոպական երկրները փորձում են գործարկել իրենց միջև խորհրդակցությունների լայնածավալ մեխանիզմ։ Ինչպիսի՞ն կլինի այս դեպքում եվրոպական անվտանգության ապագա ճարտարապետությունը: Մենք տեսնում ենք, որ եվրոպացի առաջնորդներն արդեն սկսել են բարձրաձայնել և քննարկել եվրոպական անվտանգության ճարտարապետության հարցերն առանց ՆԱՏՕ-ի։ Եթե եվրոպական անվտանգության ճարտարապետությունը պետք է վերակառուցվի, դա հնարավոր չէ անել առանց Թուրքիայի»,-ասել է Ֆիդանը։
Նա նաև ընդգծել է, որ «եվրոպական անվտանգության ճարտարապետության կառուցման մոտեցումը, որը բացառում է Թուրքիայի նման ռազմական տերությունը, այնքան էլ իրատեսական չէ»։
Անդրադառնալով ուկրաինական կարգավորման թեմային՝ նա նշել է, որ ուկրաինական պատերազմի վերաբերյալ ԱՄՆ-ի նոր վարչակազմի տեսակետներն ու քաղաքականությունը գրեթե լիովին հակասում են Ջո Բայդենի վարչակազմի օրոք Սպիտակ տան տեսակետներին ու քաղաքականությանը։
«Մենք հասկանում ենք, որ նրանք ձգտում են հիմք ստեղծել այնպիսի համաձայնագրի համար, որը նախատեսում է փոխհատուցել Ուկրաինայում իրենց կատարածի ծախսերը»,- նշել է թուրք նախարարը։
Ֆիդանը կարծիք է հայտնել, որ փետրվարի 28-ին Ուկրաինայի նախագահ Վլադիմիր Զելենսկիի՝ Վաշինգտոն նախանշված այցի ընթացքում համաձայնագիր կստորագրվի Ուկրաինայի հանքային պաշարների վերաբերյալ։
«Որքան մենք հասկանում ենք՝ քննարկվում է նաև այն հարցը, թե դրա դիմաց ինչ երաշխիքներ կստանա Ուկրաինան»,- ասել է նա։
Դիվանագետը նշել է, որ ուկրաինական կողմն ունի «գործնական, կոնկրետ պահանջներ՝ կապված ռազմական աջակցության և անվտանգության երաշխիքների տրամադրման հետ, հատկապես ԱՄՆ-ից՝ հրադադարի վերաբերյալ խաղաղ համաձայնագրի կնքման դեպքում»։
«Մենք կտեսնենք, թե ինչպես կկատարվեն այդ պահանջները, և դրանց որ մասին ամերիկացիներն «այո» կպատասխանեն»,- հավելել է թուրք դիվանագետը՝ նշելով, որ եվրոպացի առաջնորդները համապատասխան թեմայի շուրջ «լուրջ բանակցություններ» են վարում ինչպես Միացյալ Նահանգների, այնպես էլ իրենց միջև։
Ֆիդանը հայտնել է, որ ԵՄ առաջնորդները կարող են մարտի 1-2-ին հավաքվել «Եվրոպական անվտանգությունը և Ուկրաինան» թեմայով հանդիպմանը։
Թարգմանությունը՝ Էմմա Չոբանյանի
