Քաղաքականություն
26.02.2025 | 23:18
Թուրքիան և Ուկրաինան արագացրել են հետպատերազմյան վերակառուցման շուրջ բանակցությունները, թուրքական ընկերությունները պատրաստվում են մասնակցել ենթակառուցվածքային նախագծերին: Ուկրաինայի իշխանությունները նախագծի ծրագրի թղթապանակները կիսել են թուրք պաշտոնյաների հետ, հրատապ նախաձեռնությունների համար մրցույթներ կանցկացվեն 2025 թվականի ապրիլին և մայիսին, գրում է Türkiye gazetesi-ն։
Նշվում է, որ Կիևում Թուրքիայի դեսպանատան և Ուկրաինայի ենթակառուցվածքների զարգացման և նորացման պետական գործակալության պաշտոնյաները հանդիպել են՝ քննարկելու Թուրքիայի կողմից իրականացվող ընթացիկ ծրագրերը և ապագա համագործակցությունը: Ուկրաինացի պաշտոնյաները հաստատել են, որ երկրի վերակառուցման ծրագրերն ընթացքի մեջ են: Որոշ հրատապ ծրագրերի համար մրցույթը լինելու է ապրիլին և մայիսին, մինչդեռ լրացուցիչ լայնածավալ նախաձեռնություններ են նախատեսվում 2025 թվականին։
Ուկրաինայի գլխավոր առաջնահերթություններից մեկը ճանապարհային ենթակառուցվածքների և սահմանային անցումների արդիականացումն է: Պլանները ներառում են գործող սահմանային անցակետերի վերանորոգում, սահմանային նոր օբյեկտների կառուցում համապետական վճարովի ճանապարհային համակարգի ներդրում։
Ուկրաինացի պաշտոնյաները հայտարարել են, որ այդ նախագծերի մրցույթները նախատեսվում են 2025 թվականին։
Ուկրաինական պատվիրակությունը թուրք պաշտոնյաներին տրամադրել է 2025 թվականի այլ առաջնահերթ ուղղություններ: Դրանք ներառում են էներգետիկ և էներգաարդյունավետության նախագծեր, սոցիալական բնակարանային նախաձեռնություններ, ջրամատակարարման նախագծեր։
Այս քննարկումները հաջորդել են Անկարայում նախագահ Ռեջեփ Թայիփ Էրդողանի և Ուկրաինայի նախագահ Վլադիմիր Զելենսկիի հանդիպմանը։ Բանակցությունների ընթացքում Էրդողանն ընդգծել էր Թուրքիայի հանձնառությունը՝ աջակցելու Ուկրաինայի վերականգնման ջանքերին։
«Ես անկեղծորեն հավատում եմ, որ Ուկրաինայում խաղաղության հաստատմամբ մեր հարաբերությունները կհասնեն է՛լ ավելի բարձր մակարդակի, որը հարիր է մեր ռազմավարական գործընկերությանը»,- հայտարարել էր Էրդողանը։
Թարգմանությունը՝ Էմմա Չոբանյանի
