13.05.2025 | 16:02
Ջրասուզակը հայտնաբերել է քաղաքացու դին և դուրս բերել ափ
Հազվագյուտ երկնային տեսարան. այս շաբաթ յոթ մոլորակներ կշարվեն մեկ գծի վրա
Քաղաքականություն
26.02.2025 | 13:20
Այս շաբաթ տիեզերքի սիրահարներին անմոռանալի տեսարան է սպասվում. բոլոր յոթ մոլորակները՝ Մարսը, Յուպիտերը, Ուրանը, Վեներան, Նեպտունը, Մերկուրին և Սատուրնը, կարճ ժամանակով տեսանելի կլինեն Երկրի երեկոյան երկնքում:
Այս երևույթը հայտնի է որպես մոլորակների շքերթ, երբ մի քանի մոլորակներ շարվում են իրար մոտ, իսկ Երկրից դիտելիս պատրանք է ստեղծվում, որ դրանք մեկ շարք են կանգնել, գրում է BBC-ի ռուսական ծառայությունը։
Այս աստղագիտական երևույթը (գիտական հանրության մեջ այն սովորաբար անվանում են մոլորակների հավասարեցում) կարելի է դիտել հունվարի 21-ից փետրվարի 28-ը։ Սա կլինի վերջին անգամը մինչև 2040 թվականը, երբ յոթ մոլորակներն այդքան բարենպաստ կշարվեն երկրացիների համար:
Առավելագույն թվով մոլորակներ տեսնելու լավագույն ժամանակը կլինի այս շաբաթ մայրամուտից գրեթե անմիջապես հետո՝ երեքշաբթի, չորեքշաբթի, հինգշաբթի և ուրբաթ օրերին:
Չորս մոլորակները՝ Մերկուրին, Վեներան, Յուպիտերը և Մարսը, տեսանելի կլինեն անզեն աչքով: Սատուրնի հետ ավելի դժվար է, քանի որ այն ցածր կլինի հորիզոնից: Մյուս երկու մոլորակները՝ Ուրանը և Նեպտունը տեսնելու համար անհրաժեշտ կլինի աստղադիտակ։
Հորիզոնի լավ տեսարանով և մաքուր երկնքով ավելի լավ հնարավորություն կլինի տեսնելու բոլոր յոթ մոլորակները: Այնուամենայնիվ, այս հնարավորությունը շատ կարճ է լինելու։
Արեգակի մայրամուտին Սատուրնը և Մերկուրին նույնպես մայր կմտնեն, ինչը հատկապես կդժվարացնի դրանք դիտարկելը:
«Դուք միայն մի քանի րոպե կունենաք մայրամուտից հետո նրանց տեսնելու համար, մինչև նրանք ընկնեն հորիզոնից ներքև: Դրանից հետո դեռ երկար ժամանակ կկարողանաք հստակ տեսնել Վեներան, Յուպիտերը և Մարսը»,- ասել է Գրինվիչի թագավորական աստղադիտարանի աստղագետ Էդվարդ Բլումերը։
Թարգմանությունը՝ Տաթև Ֆռանգյանի
