Քաղաքականություն
24.02.2025 | 20:28ՆԱՏՕ-ին Ուկրաինայի անդամակցությունը մնում է կենտրոնական խնդիր։ Այս մասին հայտարարել է Թուրքիայի արտգործնախարար Հաքան Ֆիդանը Bloomberg-ին տված հարցազրույցում, փոխանցում է Turkiye Today-ը։
Ֆիդանը ներկայացրել է Թուրքիայի դիրքորոշումը ՆԱՏՕ-ին Ուկրաինայի հնարավոր անդամակցության վերաբերյալ, նաև խոսել Թուրքիայի ավելի լայն տնտեսական ռազմավարության մասին։
«ՆԱՏՕ-ին անդամակցելու [Ուկրաինայի] ցանկությունը չի հակադրվի, բայց մենք պետք է շատ իրատես լինենք։ Ես վստահ չեմ՝ արդյո՞ք ԱՄՆ նախորդ վարչակազմը կողմ է եղել ՆԱՏՕ-ին Ուկրաինայի անդամակցությանը։ Ուստի, ես չեմ հավատում, որ այս հարցում նոր քաղաքականություն կա»,- ասել է Ֆիդանը։
Ըստ նրա՝ Ուկրաինայի հնարավոր անդամակցության վերաբերյալ քննարկումներ են անցկացվել եվրոպացի գործընկերների և ուկրաինացի դաշնակիցների հետ՝ ընդգծելով, որ Կիևը ձգտում է անդամակցել ՆԱՏՕ-ին ոչ միայն որպես կարգավիճակի խորհրդանիշ, այլ նաև ապահովելու իր ազգային անվտանգությունը։
«Մենք ոչինչ չենք ասի նրանց, որոնք ցանկանում են անդամակցել ՆԱՏՕ-ին, բայց մենք պետք է շատ իրատես լինենք։ Սա մեր նախագահի հայտարարած պաշտոնական դիրքորոշումն է»,- ասել է Թուրքիայի ԱԳ նախարարը։
Ֆիդանը նաև բացատրել է, որ չնայած Եվրամիությանն անդամակցելու տասնամյակների անհաջող փորձերին՝ «Թուրքիան դեռևս ձգտում է միանալ BRICS երկրներին՝ որպես իր տնտեսության ամրապնդման ջանքերի մի մաս»: Նա հավելել է, որ Էրդողանը «ձգտում է մեծացնել Թուրքիայի տնտեսական դիվերսիֆիկացիան» և հիշեցրել, որ ԵՄ-ն «իրենց առաջին ընտրությունն է»։
Պաշտոնյան նաև նշել է, որ ԵՄ-ն արգելափակել է Թուրքիայի անդամակցությունը մարդու իրավունքների և ժողովրդավարական չափանիշների հետ կապված խնդիրների պատճառով։ Չնայած Թուրքիան պաշտոնապես դիմել է BRICS-ին միանալու համար՝ այն մինչ այժմ ստացել է միայն «գործընկեր երկրի կարգավիճակ»:
Թարգմանությունը՝ Էմմա Չոբանյանի
