Շարունակում ենք մեր վճռական աջակցությունը Ուկրաինայի տարածքային ամբողջականությանը․ Էրդողան

Թուրքիայի նախագահ Ռեջեփ Թայիփ Էրդողանը կրկնել է ռուս-ուկրաինական շարունակվող պատերազմում «արդար և կայուն խաղաղության» իր կոչը՝ ընդգծելով, որ ցանկացած բանակցություն պետք է ապահովի երկու կողմերի հավասար և արդար ներկայացվածությունը։ Այս մասին Էրդողանը հայտարարել է Ղրիմի պլատֆորմի առաջնորդների չորրորդ գագաթնաժողովի մասնակիցներին ուղղված տեսաուղերձում, որտեղ նա վերահաստատել է Թուրքիայի շարունակական աջակցությունը Ուկրաինայի ինքնիշխանությանը և տարածքային ամբողջականությանը, փոխանցում է TRT Haber-ը։

«Այս տխուր օրը, երբ նշում ենք պատերազմի երրորդ տարելիցը, ուզում եմ հայտնել, որ մենք՝ որպես երկիր և ազգ, աջակցում ենք բարեկամ ուկրաինացի ժողովրդին։ Ես իմ ցավակցությունն եմ հայտնում ուկրաինացիների ընտանիքներին, որոնք  իրենց կյանքն են տվել՝ պաշտպանելով իրենց հողերը վերջին երեք տարիների ընթացքում»,- իր խոսքը այսպես է սկսել Էրդողանը։

Հիշեցնելով, որ Թուրքիան 2014 թվականին Ղրիմի բռնակցումից հետո անհրաժեշտ աջակցություն է ցուցաբերել Ուկրաինային՝ միջազգային իրավունքի հիմնարար սկզբունքներին համապատասխան, Էրդողանն ասել է. «Միևնույն ժամանակ, մենք շարունակում ենք վճռականորեն աջակցել Ուկրաինայի տարածքային ամբողջականությանը, ինքնիշխանությանը և անկախությանը»։

Նշելով, որ դիվանագիտության, երկխոսության և բանակցությունների վրա հիմնված մոտեցումները թափ են հավաքել, Թուրքիայի նախագահը հավելել է․ «Հուսով ենք, որ այս գործընթացը կդառնա հակամարտությունների դադարեցման և կայուն խաղաղության հաստատման սկիզբը։ Հենց սկզբից պնդել ենք, որ արդար և կայուն խաղաղության ճանապարհը կարող է բացվել միայն այն հավասարման միջոցով, որտեղ պատերազմի երկու կողմերն էլ ներկայացված են հավասարապես և արդարացիորեն»։

Էրդողանը նաև ընդգծել է իր վերջին քննարկումները նախագահ Զելենսկիի հետ Ուկրաինայի ղեկավարի՝ Անկարա կատարած այցի ժամանակ, որի ընթացքում քննարկվել է Թուրքիայի դերը որպես միջնորդ և ապագա բանակցությունների պոտենցիալ հյուրընկալող։

Թարգմանությունը՝ Էմմա Չոբանյանի