Դոնալդ Թրամփը հայտարարել է Ուկրաինային տրամադրվող ամերիկյան օգնության աուդիտի մասին

ԱՄՆ նախագահ Դոնալդ Թրամփը կոչ է արել հետաքննել, թե կոնկրետ ինչ նպատակների համար է օգտագործվել Վաշինգտոնի կողմից Կիևին որպես ֆինանսական օգնություն հատկացված գումարը Ռուսաստանի դեմ Ուկրաինայի պատերազմի ժամանակ։ Բացի այդ, նա կրկնել է իր հայտարարությունն Ուկրաինայում ընտրություններ անցկացնելու անհրաժեշտության մասին, գրում է DW-ի ռուսական ծառայությունը։

«Հիանալի է ասել, գիտեք՝ մենք չենք կարող ընտրություններ անցկացնել։ Բայց ժամանակն է անցկացնել ընտրություններ, ճիշտ այնպես, ինչպես ժամանակն է պարզել, թե ինչ եղավ այդ գումարների հետ: Որովհետև նա [Ուկրաինայի նախագահ Վլադիմիր Զելենսկին] հայտարարություն է արել, թե չգիտի՝ որտեղ է փողի կեսը, կամ նման բան»,- հայտարարել է Թրամփը:

Միաժամանակ, մի շարք հեղինակավոր արևմտյան լրատվամիջոցներ, ներառյալ՝ բրիտանական The Guardian պարբերականն ու ամերիկյան CNN հեռուստաալիքը, հրապարակում են փաստերի ստուգման զեկույցներ, որոնք կոչված են ցույց տալ Կիևի կողմից ֆինանսական օգնության չարաշահման վերաբերյալ Թրամփի մեղադրանքների անհիմն լինելը:

Ուկրաինայի կողմից ամերիկյան միջոցների ծախսման վերաբերյալ Թրամփի մեկնաբանությունը կապված է Վլադիմիր Զելենսկիի հետ փետրվարի 2-ին AP գործակալության հրապարակած հարցազրույցի հետ։ Այն ժամանակ Ուկրաինայի ղեկավարն ասել էր, որ ԱՄՆ-ի քաղաքական գործիչներից լսել է, որ ամերիկացիներն «Ուկրաինային 177 միլիարդ դոլարի օգնություն են տվել»։

«Ես չգիտեմ, թե որտեղ է այս ամբողջ գումարը, միգուցե, իսկապես թղթի վրա է, միգուցե, հարյուրավոր տարբեր ծրագրեր կան, մենք չենք վիճում, մենք շնորհակալ ենք ամեն ինչի համար: Բայց որպես նախագահ՝ ասում եմ՝ ստացել ենք, ես արձանագրում եմ սա, ավելի քան 70 միլիարդ, և սա մեծ օգնություն է, բայց դա 200 միլիարդ չէ»,- հայտարարել էր Զելենսկին:

Թարգմանությունը՝ Տաթև Ֆռանգյանի