06.04.2025 | 22:02
Աշխարհի ամենաթանկարժեք կենտրոնական պաշտպանները
Եվրոպայի առաջնորդները Փարիզում կհանդիպեն Ուկրաինայի շուրջ միասնական դիրքորոշում ձևավորելու համար․ ԶԼՄ
Քաղաքականություն
16.02.2025 | 17:20
Եվրոպական երկրների ղեկավարները Մյունխենի անվտանգության համաժողովի ավարտից հետո կհանդիպեն Փարիզում՝ Ուկրաինայի վերաբերյալ համատեղ դիրքորոշում մշակելու նպատակով։ Այս մասին փետրվարի 16-ին հայտնել են մի քանի լրատվամիջոցներ՝ հղում անելով դիվանագիտական աղբյուրներին։
BBC-ի տեղեկություններով՝ այս ոչ ֆորմալ հանդիպման նախաձեռնությունը պատկանում է Ֆրանսիայի նախագահ Էմանուել Մակրոնին, իսկ դրա հիմնական գաղափարական ուղղությունը ստանձնել է Մեծ Բրիտանիայի վարչապետ Քիր Սթարմերը։
Ելիսեյան պալատը դեռևս պաշտոնական հայտարարություն չի տարածել հանդիպման վերաբերյալ, սակայն Լեհաստանի պատգամավոր Գրեժոգժ Սխետինան RMF FM ռադիոկայանին հայտնել է, որ երկրի վարչապետ Դոնալդ Տուսկը փետրվարի 17-ին կմասնակցի հանդիպմանը։ Ավելի վաղ Լեհաստանի արտգործնախարար Ռադոսլավ Սիկորսկին X սոցիալական ցանցում գրել էր, որ Մակրոնը «արդեն հրավիրում է Եվրոպայի առաջնորդներին Փարիզ», սակայն ավելի ուշ ջնջել էր գրառումը։
Reuters գործակալությունը հայտնում է, որ հանդիպման նպատակը Եվրոպայի միասնական դիրքորոշման ձևավորումն է՝ կապված Ուկրաինայի վերաբերյալ ԱՄՆ-ի կողմից առաջ մղվող խաղաղ բանակցությունների հետ, որոնց շրջանակում եվրոպական երկրների ներգրավվածությունը սահմանափակ է։
Նշվում է, որ Քիր Սթարմերը ծրագրում է եվրոպական գագաթնաժողովից հետո քննարկել դրա արդյունքները ԱՄՆ նախագահ Դոնալդ Թրամփի հետ։ Նրանց հանդիպումը Վաշինգտոնում նախատեսված է փետրվարի վերջին։ Դրանից հետո հնարավոր է ևս մեկ գագաթնաժողով՝ եվրոպացի առաջնորդների և Ուկրաինայի նախագահ Վլադիմիր Զելենսկու մասնակցությամբ։
