08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Թրամփի վարչակազմն աշխատանքից ազատել է միջուկային անվտանգության ազգային վարչության տասնյակ աշխատակիցների
Քաղաքականություն
15.02.2025 | 15:16
ԱՄՆ նախագահ Դոնալդ Թրամփի վարչակազմի պաշտոնյաները աշխատանքից ազատել են միջուկային անվտանգության ազգային վարչության (NNSA) աշխատակիցներին, որոնք պատասխանատու են երկրի միջուկային զենքի պաշարների կառավարման համար։
«Արմենպրես»-ի փոխանցմամբ՝ CNN-ը հայտնում է, որ պաշտոնանկությունները տեղի են ունեցել էներգետիկայի նախարարության բարեփոխումների շրջանակում։ Հեռուստաընկերության ներկայացրած տվյալներով՝ աշխատանքից ազատվել է ավելի քան 300 աշխատակից։ Այնուամենայնիվ, ԱՄՆ Էներգետիկայի նախարարության ներկայացուցիչը հերքել է այս թիվը՝ նշելով, որ հեռացվածների թիվը «50-ից պակաս է» և նրանք հիմնականում զբաղեցրել են վարչական պաշտոններ։
Աշխատանքից ազատվածների թվում եղել են նաև այն անձինք, ովքեր աշխատել են միջուկային զենք արտադրող օբյեկտներում և իրականացրել են այդ գործընթացների վերահսկողությունը։ Մասնավորապես, նրանց թվում են եղել շտաբի աշխատակիցներ, որոնք կապալառուների համար պահանջներ և հրահանգներ են կազմում։
CNN-ին տրամադրված աղբյուրների համաձայն՝ որոշ պաշտոնյաներ, կարծես, տեղյակ չեն եղել, որ NNSA-ն իրականացնում է Ամերիկայի միջուկային զենքի վերահսկողությունը։
«Մարդիկ հեռացվել են աշխատանքից, քանի որ ոչ ոք ժամանակ չի հատկացրել հասկանալու, թե ինչով ենք մենք զբաղվում, որն է մեր աշխատանքի կարևորությունը երկրի ազգային անվտանգության հարցում»,- նշում է աղբյուրը։
