08.09.2026 | 23:30
Պապիկյանը այցելել է ՊՆ ուսումնական կենտրոն, հրամկազմին տրվել են մի շարք հանձնարարականներ
Ղրիմի կամրջի վրա պայթյունի գործով դատավարությունը դռնփակ ռեժիմով կանցկացվի
Քաղաքականություն
12.02.2025 | 22:16
ՌԴ Դոնի Ռոստովի հարավային շրջանի ռազմական դատարանը փակ դռների հետևում կքննի Ղրիմի կամրջի վրա 2022 թվականի հոկտեմբերին տեղի ունեցած պայթյունի գործը, հայտնում է BBC-ի ռուսական ծառայությունը։
Նշվում է, որ դատական նիստը դռնփակ անցկացնելու որոշումը կայացվել է գործի նյութերում «գաղտնի» նշումով փաստաթղթերի առկայության պատճառով։
Գործով մեղադրյալների թվում են Արտյոմ Ազատյանը, Գեորգի Ազատյանը, Օլեգ Անտիպովը, Ալեքսանդր Բիլինը, Վլադիմիր Զլոբան, Դմիտրի Տյաժոլիխը, Ռոման Սոլոմկոն և Արթուր Տերչանյանը։ Նրանք մեղադրվում են ահաբեկչության և զենքի կամ պայթուցիկ նյութերի ապօրինի շրջանառության հոդվածներով։
2022 թվականի հոկտեմբերի 8-ին Ղրիմի կամրջի վրա բեռնատար է պայթել, վարորդն ու ևս չորս մարդ զոհվել են։ Ռուսական անվտանգության ուժերը Ղրիմի կամուրջը պայթեցնելու մեղադրանքով ձերբակալել են ութ անձի։
Ձերբակալվածների փաստաբաններն ու հարազատները, որոնց հետ զրուցել է BBC-ն, պնդում են, որ մարդիկ ինքնակամ գնացել են հարցաքննության, հատուկ ծառայությունների խնդրանքով ապրել են հյուրանոցում իրենց հաշվին և փորձել են օգնել հետաքննությանը՝ պնդելով իրենց անմեղությունը։
Թարգմանությունը՝ Տաթև Ֆռանգյանի
