14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Թրամփը Ֆոգելի ազատ արձակումը կապել է Ուկրաինայում հակամարտության ավարտի հետ
Քաղաքականություն
12.02.2025 | 12:10
ԱՄՆ նախագահ Դոնալդ Թրամփը հայտարարել է, որ ռուսական բանտից ամերիկացի Մարկ Ֆոգելի ազատումը կարող է «շատ կարևոր տարր» լինել Ուկրաինայում մարտերը դադարեցնելու համար: Նախագահի խոսքով՝ Վաշինգտոնն «ահռելի առաջընթաց» է գրանցել Մոսկվայի հետ փոխգործակցության հարցում։
«Այն կարող է մեծ, կարևոր մաս լինել Ուկրաինայի հետ պատերազմի ավարտի համար»,- ասել է Թրամփը Սպիտակ տանը Մարկ Ֆոգելի հետ հանդիպման ժամանակ, հայտնում է AP-ն:
ԱՄՆ նախագահը ևս մեկ անգամ վստահեցրել է, որ ձգտում է հնարավորինս շուտ վերջ դնել Ռուսաստանի և Ուկրաինայի միջև հակամարտությանը։
Փետրվարի 6-ին Մարկ Ֆոգելին դուրս են բերել Ռիբինսկի մոտակայքում գտնվող թիվ 6 ուղղիչ գաղութից, հայտնել է նրա փաստաբան Դմիտրի Օվսյաննիկովը։ Հինգ օր անց նրան ինքնաթիռով տեղափոխել են Միացյալ Նահանգներ։ Ֆոգելն ասել է, որ իրեն ներում է շնորհել ՌԴ նախագահ Վլադիմիր Պուտինը։
ՌԴ իշխանությունները դեռևս չեն մեկնաբանել Մարկ Ֆոգելի ազատ արձակումը։ Ամերիկացի ուսուցիչը ձերբակալվել է Շերեմետևոյում 2021 թվականի օգոստոսին։ 2022 թվականի հունիսին Խիմկիի դատարանը նրան դատապարտել է Քրեական օրենսգրքի 229.1 հոդվածով (թմրամիջոցների մաքսանենգություն՝ 12 տարի) և 228 հոդվածի 2-րդ մասով (թմրամիջոցների ապօրինի շրջանառություն՝ ևս երեք տարի)։
Բոլոր հանցագործությունների համար նա դատապարտվել է 14 տարվա ազատազրկման խիստ ռեժիմի գաղութում: Պաշտպանական կողմը հայտնել է, որ Մարկ Ֆոգելը հիվանդությունների պատճառով ստիպված է եղել «բժշկական մարիխուանա պարունակող դեղեր ընդունել»:
Թարգմանությունը՝ Տաթև Ֆռանգյանի
