Պողոս Պողոսյանի սպանության գործով դատարանում ցուցմունք տվեց «Առագաստ» սրճարանի տարածքում ծառայություն իրականացրած ոստիկանը

Երևանի քրեական դատարանում շարունակվում է ավելի քան 20 տարի առաջ «Առագաստ» սրճարանում տեղի ունեցած սպանության գործի քննությունը, որով մեղադրվում է Հայաստանի երկրորդ նախագահ Ռոբերտ Քոչարյանի անվտանգության աշխատակից Աղամալ Հարությունյանը:

Դատարանում այսօր հարցաքննվեց վկա Հրաչյա Համբարձումյանը, որը դեպքի ժամանակ ծառայություն է իրականացրել «Առագաստ» սրճարանի հարակից տարածքում: Նա դատարանին հայտնեց, որ սրճարանում տեղի ունեցած սպանության դեպքին ականատես չի եղել, միայն տեսել է շտապօգնության բժիշկների և հիշում է մի կնոջ, որն օգնություն էր խնդրում:

Մեղադրող Հայկ Խաչատրյանի հարցին՝ հնարավո՞ր է, որ զուգարանում գտնվող անձանց դուք եք հանել այնտեղից, ապա զանգահարել Ոստիկանության կենտրոնականի բաժին, վկան բացասական պատասխան տվեց:
Ասաց, որ նույնիսկ չի հիշում՝ ղեկավարությանը դեպքի մասին անձամբ տեղյակ պահել է, թե՞ ոչ:

Վկայի՝ դատարանում տված ցուցմունքը, սակայն հակասում է նրա՝ տարիներ առաջ տված ցուցմունքին: Տուժող Պողոս Պողոսյանի իրավահաջորդի ներկայացուցիչ Հարություն Բաղդասարյանը դատարանին միջնորդեց հրապարակել նրա նախաքննական ցուցմունքը:

Այս ցուցմունքում ոստիկան Հրաչյա Համբարձումյանը պատմել էր, որ զուգարանի ներսում տեսել է մահացածի դին, ավելին նշել է, որ բերանի շրջանում արյան հետք է եղել:

Հայտնել է նաև, որ զանգահարել է Ոստիկանության կենտրոնի բաժին, պահպանել է դեպքի վայրը մինչև օպերատիվ խմբի ժամանումը:

Վկան հայտնել է, որ կռվին ականատես չի եղել, չգիտի, թե ինչ հանգամանքներում է մահացել տվյալ անձնավորությունը կամ ով է նա:

Այն բանից հետո, երբ վկան լսեց իր նախաքննական ցուցմունքը, ասաց, որ գրել է այն, ինչ եղել ա, արդեն 24 տարի է անցել դեպքից, մանրամասները չի հիշում:

Մեղադրողը դիտարկեց, որ երբ զուգարանում դի տեսնելու և Ոստիկանություն զանգահարելու մասին ինքը հարց տվեց վկային, նա չհիշեց այդ դրվագը, մինչդեռ ցուցմունքները լսելուց հետո հիշեց:

«Ինչ եղել ա, ազնվորեն գրել եմ, ես երկու վիրահատություն եմ տարել, հիվանդ եմ»,- ասաց վկա Համբարձումյանը:

Արաքս Մամուլյան