10.08.2026 | 12:20
Ռուբեն Վարդանյանի կինը սպասում է ԱԳՆ-ի հետ կապին՝ Բաքու կանանց մարդասիրական այցը քննարկելու համար. հայտարարություն
ԵՄ-ն վճռական պատասխան կտա Թրամփի կողմից պողպատի և ալյումինի ներկրման համար մաքսատուրքերի սահմանմանը
Քաղաքականություն
11.02.2025 | 21:55
Եվրամիությունը վճռական պատասխան կտա ԱՄՆ նախագահ Դոնալդ Թրամփի վարչակազմի կողմից պողպատի և ալյումինի ներկրման համար հատուկ մաքսատուրքերի սահմանմանը։ Այս մասին հայտարարել է Եվրահանձնաժողովի նախագահ Ուրսուլա ֆոն դեր Լեյենը, գրում է DW-ի ռուսական ծառայությունը։
«Ես խորապես ափսոսում եմ Եվրոպայից պողպատի և ալյումինի արտահանման համար մաքսատուրքեր սահմանելու՝ ԱՄՆ որոշման համար»,- ասել է նա Բրյուսելում։
Պաշտոնյան հավելյալ վճարումներն անվանել է անօրինական և վնասակար Եվրամիության համար։
«Դրանք անպատասխան չեն մնա և կհանգեցնեն վճռական ու համաչափ հակաքայլերի»,- ասել է Եվրահանձնաժողովի նախագահը։
Նրա խոսքով՝ Եվրամիությունը գործելու է՝ իր տնտեսական շահերը պաշտպանելու համար և իր երկրներում կկանգնի աշխատողների, ընկերությունների և սպառողների կողքին։ Ուրսուլա ֆոն դեր Լեյենը չի հստակեցրել, թե կոնկրետ ինչ միջոցներ է ձեռնարկելու ԵՄ-ն։ Ըստ dpa-ի՝ հավանական է համարվում, որ հատուկ տուրքերը կվերականգնվեն ամերիկյան արտադրության ջինսերի, վիսկիի, մոտոցիկլետների, գետնանուշի կարագի և այլ ապրանքների ներմուծման վրա։ Մաքսատուրքերը, որոնք սահմանել էր ԵՄ-ն՝ ի պատասխան Թրամփի՝ իր նախորդ պաշտոնավարման ընթացքում եվրոպական պողպատի և ալյումինի ներմուծման մաքսատուրքերի համար, կասեցվել էին Բայդենի վարչակազմի հետ համաձայնությամբ։
Առևտրի և տնտեսական քաղաքականության հարցերով եվրահանձնակատար Մարոշ Շեֆչովիչը Եվրախորհրդարանում հայտարարել է, որ ԵՄ-ն ներկայում ուսումնասիրում է Թրամփի պատժիչ միջոցների մասշտաբները, ինչից հետո հակաքայլեր կձեռնարկի։
Նա նաև ընդգծել է, որ Բրյուսելը պատրաստ է բանակցությունների և երկու կողմերի համար շահավետ լուծումներ փնտրելու։
Նախօրեին Դոնալդ Թրամփը գործադիր հրաման է ստորագրել ԱՄՆ ներմուծվող պողպատի և ալյումինի համար 25 տոկոս մաքսատուրք սահմանելու մասին։
Թարգմանությունը՝ Էմմա Չոբանյանի
