20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
ԱՄՆ-ը հայտարարել է Պանամայի ջրանցքով ամերիկյան նավերի համար վճարների չեղարկման մասին․ Պանաման հերքում է
Քաղաքականություն
06.02.2025 | 14:06
Պանամայի իշխանությունները հրաժարվել են Պանամայի ջրանցքով ԱՄՆ-ին պատկանող նավերի անցման վճարներից, հայտարարել է ԱՄՆ Պետքարտուղարության մամուլի ծառայությունը։ Պանաման, սակայն, հերքել է տեղեկությունը, հաղորդում է Current Time-ը։
«ԱՄՆ կառավարական նավերն այժմ կարող են անցնել Պանամայի ջրանցքով՝ առանց վճարման, ինչի արդյունքում ԱՄՆ կառավարությունը տարեկան միլիոնավոր դոլարներ կխնայի»,- ասվում է X-ում ԱՄՆ Պետքարտուղարության տարածած հայտարարության մեջ։
Փետրվարի 3-ին ԱՄՆ պետքարտուղար Մարկո Ռուբիոն հանդիպել է Պանամայի նախագահ Խոսե Ռաուլ Մուլինոյի հետ Կենտրոնական Ամերիկա կատարած այցի ժամանակ։ Բանակցություններից հետո Պանաման հրաժարվել է երկարաձգել Չինաստանի հետ «Մեկ գոտի՝ մեկ ճանապարհ» նախաձեռնության մասին փոխըմբռնման հուշագիրը։
Ավելի ուշ Պանամայի իշխանությունները հերքել են ԱՄՆ Պետքարտուղարության հաղորդագրությունն այն մասին, որ հրաժարվել են ԱՄՆ-ին պատկանող նավերից վճար գանձելուց:
«Հաշվի առնելով Պետքարտուղարության հայտարարությունը՝ Պանամայի ջրանցքի վարչությունը, որն իրավասու է սահմանել տարանցման մաքսատուրքեր և այլ վճարներ ջրանցքով տարանցման համար, տեղեկացնում է, որ դրանցում որևէ փոփոխություններ չի կատարել»,- ասվում է X-ում տարածված հայտարարությունում:
ԱՄՆ նախագահ Դոնալդ Թրամփն ավելի վաղ հայտարարել էր, որ «ամերիկյան նավերը չափից դուրս շատ են վճարում» Պանամայի ջրանցքով անցնելու համար։ Հունվարի 20-ին իր երդմնակալության արարողության ժամանակ ունեցած ելույթում Թրամփն ասել էր, թե Չինաստանն է վերահսկում Պանամայի ջրանցքը, «իսկ մենք այն չենք տվել Չինաստանին, մենք տվել ենք Պանամային»:
Թարգմանությունը՝ Տաթև Ֆռանգյանի
