Բաքվում այսօր կշարունակվի Ռուբեն Վարդանյանի և Արցախի մյուս ղեկավարների շինծու գործերով դատական նիստը

Բաքվի զինվորական դատարանում այսօր տեղի կունենա Ադրբեջանում ապօրինի պահվող Արցախի ռազմաքաղաքական ղեկավարների դեմ հարուցված շինծու քրգործերով հերթական դատական նիստը: Ադրբեջանական լրատվամիջոցների հաղորդմամբ՝ սպասվում է, որ նիստը կսկսվի գործի ըստ էության քննությամբ, իսկ դատախազները մեղադրական եզրակացությունները կներկայացնեն։

Նախ տեղի կունենա Արցախի նախկին պետնախարար Ռուբեն Վարդանյանի գործով նիստը, ավելի ուշ՝ ԼՂ մյուս ղեկավարների ու պաշտոնյաների։

Հիշեցնենք, որ հունվարի 27-ին տեղի էին ունեցել նախորդ դատական նիստերը։ Արցախի նախկին պետնախարար Ռուբեն Վարդանյանն ասել էր, որ չի կարողանում մանրամասն ծանոթանալ քրեական գործի նյութերին և դատարանին խնդրել էր  լրացուցիչ 30 աշխատանքային օր տրամադրել՝ իր պաշտպանությունը նախապատրաստելու համար։ Նրա պաշտպան Ավրահամ Բերմանը նույնպես խնդրել էր լրացուցիչ ժամանակ տրամադրել։ Դատավորները որոշել էին մերժել միջնորդությունը՝ համաձայնելով պետական մեղադրողների կարծիքին, որ պաշտպանական կողմին, իբր, բավարար ժամանակ է տրվել գործի նյութերին ծանոթանալու համար։ Դատարանը նաև խափանման միջոցն է թողել անփոփոխ։

Արցախի մյուս պաշտոնյաների՝ շուրջ 15 անձի գործով նիստին խոսել են Բակո Սահակյանի, Էրիկ Ղազարյանի, Արայիկ Հարությունյանի, Մելիքսեթ Փաշայանի, Արկադի Ղուկասյանի, Լևոն Մնացականյանը, Վասիլ Բեգլարյանի, Դավիթ Ալլահվերդիյանի փաստաբանները՝ ներկայացնելով նոր միջնորդություններ։ Փաստաբանները հայտարարել էին, որ առաջադրված որոշ մեղադրանքներ չեն վերաբերում իրենց պաշտպանյալներին, և դատարանին խնդրել վերացնել քրեական հետապնդումն այդ հոդվածներով։

Մեղադրյալներից մի քանիսի կալանքը տնային կալանքով փոխարինելու և որոշ կետերով քրեական գործը մասնակի կարճելու վերաբերյալ պաշտպանական կողմի միջնորդությունները չեն բավարարվել։ Քրեական գործը փոխանցվել է դատաքննության, խափանման միջոց կալանավորումը՝ թողնվել անփոփոխ։

Թարգմանությունը՝ Էմմա Չոբանյանի