25.06.2026 | 02:11
ԱԱ-2026. Շվեյցարիան ու Կանադան դուրս եկան փլեյ-օֆֆ. ՏԵՍԱՆՅՈՒԹ
Թրամփն Ուկրաինային օգնության դիմաց հազվագյուտ մետաղներ է ուզում
Քաղաքականություն
04.02.2025 | 12:54
ԱՄՆ նախագահ Դոնալդ Թրամփը փետրվարի 3-ին հայտարարել է, որ Ուկրաինային օգնությունը կշարունակվի, եթե Կիևը խոստանա ԱՄՆ-ին մատակարարել հազվագյուտ մետաղներ, գրում է DW-ի ռուսական ծառայությունը։
«Մենք Ուկրաինային ասում ենք, որ նրանք ունեն շատ արժեքավոր հազվագյուտ հողային մետաղներ։ Մենք ցանկանում ենք գործարք կնքել Ուկրաինայի հետ, որի շրջանակում նրանք մեր մատակարարումների դիմաց կտրամադրեն իրենց հազվագյուտ հողային մետաղները և այլ իրեր»,- ասել է նա լրագրողներին։
Հարցին՝ արդյո՞ք ԱՄՆ նախագահը ցանկանում է, որ Կիևը ռեսուրսներ մատակարարի Վաշինգտոնին, Թրամփը դրական է պատասխանել՝ նշելով, որ «ցանկանում է ունենալ երաշխիքներ» հազվագյուտ հողային մետաղների մատակարարման համար։ Նրա պնդմամբ՝ Ուկրաինան արդեն պատրաստ է դրան։
Սպիտակ տան ղեկավարի խոսքով՝ ինքը ցանկանում է, որ Կիևը «փոխհատուցի» Վաշինգտոնին «գրեթե 300 միլիարդ դոլարի» տրամադրված աջակցության համար։
AFP-ն հիշեցնում է, որ արևմտյան երկրների հասանելիությունը Ուկրաինայի հազվագյուտ հողային մետաղներին նախագահ Վլադիմիր Զելենսկիի «հաղթական ծրագրի» կետերից մեկն է։ Նա Կիևին աջակցող երկրներին խոստացել է «ապահովել ներդրումների վերադարձը» և նշել Ուկրաինայի բնական ռեսուրսները, այդ թվում՝ «կրիտիկական կարևորության մետաղները տրիլիոնավոր դոլարներ արժողությամբ»։
Թարգմանությունը՝ Տաթև Ֆռանգյանի
