Ստամբուլի ընդդիմադիր քաղաքապետին աջակցելու համար դատարանի շենքի մոտ հարյուրավոր մարդիկ են հավաքվել․ բախումներ են եղել ոստիկանների հետ․ՏԵՍԱՆՅՈՒԹ

Ստամբուլի ընդդիմադիր  քաղաքապետ Էքրեմ Իմամօղլուն այսօր առավոտյան  ներկայացել է քաղաքի Չաղլայանի դատարան՝ երկու առանձին գործերով ցուցմունք տալու՝ կապված Ստամբուլի գլխավոր դատախազի և դատարանի կողմից նշանակված փորձագետի մասին իր խոսքերի հետ։

Թուրքական  լրատվամիջոցների հաղորդմամբ՝ քննությունն անսպասելի ընթացք է ստացել, երբ նրա գործով նշանակված դատախազը փոխվել է ցուցմունքից մի քանի ժամ առաջ։

Գործերից մեկով Իմամօղլուին մեղադրվում է «հահաբեկչության դեմ պայքարող պաշտոնյային որպես ահաբեկչական խմբավորումների թիրախ նշելու» մեջ՝ գլխավոր դատախազ Աքին Գյուրլեքի հասցեին արված հայտարարությունների պատճառով։

Մեկ այլ գործով  նա մեղադրվում է «դատական ​​համակարգի վրա ազդելու փորձի» մեջ այն բանից հետո, երբ բացահայտել է փորձագետի մասնակցությունը բազմաթիվ հետաքննություններին, որոնք ուղղված են իր Ժողովրդահանրապետական կուսակցության (CHP) ղեկավարած քաղաքապետարաններին:

CHP-ի հարյուրավոր անդամներ և համախոհներ, այդ թվում՝ Անկարայի քաղաքապետ Մանսուր Յավաշը, Իմամօղլուին ուղեկցել են դատարանի շենք՝ իրենց աջակցությունը ցույց տալու։

Դատարանի մուտքի և հարակից թաղամասերի մոտ տեղակայված են եղել զրահամեքենաներ և պարեկային ծառայության աշխատակիցներ։

Անկարայի քաղաքապետ Մանսուր Յավաշը, որը նույնպես CHP-ի անդամ է, դատարանի մոտ հայտարարել է․«Ես չեմ կարծում, որ Իմամօղլուի դեմ գործ հարուցելու հիմքեր կան։ Հուսով եմ, որ այսուհետ իրավական համակարգը կաշխատի այնպես, ինչպես պետք է։ Մեր երկրի բարօրության համար դատական ​​համակարգը պետք է անաչառ մնա և քաղաքական գործիչներից պատվերներ չընդունի»։

Մինչ  դատարանի շենքի մոտ հավաքվածները շարունակել են  կարգախոսներ վանկարկել, ոստիկանները նրանց դեմ արցունքաբեր գազ և մահակներ են կիրառել։

Թուրքական լրատվամիջոցները հայտնում են, որ բախումներ են  տեղի ունեցել ոստիկանների և այն ցուցարարների միջև, որոնք ցանկանում էին մոտենալ ավտոբուսին, որտեղ ցուցմունք տալուց հետո պետք է ելույթ ունենար Էքրեմ Իմամօղլուն։

Թարգմանությունը՝ Էմմա Չոբանյանի