ՌԴ շրջանները ենթարկվել են ԱԹՍ-ների հարձակման․Վոլգոգրադի նավթավերամշակման գործարանում հրդեհ է բռնկվել

Վոլգոգրադի մարզի նահանգապետ Անդրեյ Բոչարովը հունվարի 31-ի առավոտյան հայտարարել է, որ անօդաչու սարքերը հարված են հասցրել տեղի նավթավերամշակման գործարանին։ Շրջանի ղեկավարի հաղորդմամբ նավթավերամշակման գործարանի վրա ընկել են ԱԹՍ-ի բեկորները, գրում է Current time-ը։

«ԱԹՍ-ներից մեկի բեկորների անկման հետևանքով նավթավերամշակման գործարանի տարածքում հրդեհ է բռնկվել, որն արագորեն մարվել է։ Գործարանի մեկ վիրավոր աշխատող հոսպիտալացվել է»,- ասել է Բոչարովը։

Ավելի վաղ տելեգրամ ալիքները, վկայակոչելով  տեղի բնակիչներին, հայտնել էին, որ պայթյունների և կրակոցների ձայների մասին Վոլգոգրադի մարզի Կրասնոարմեյսկի շրջանի նավթավերամշակման գործարանի տարածքում։ Ականատեսների վկայությամբ՝ նրանք լսել են գլխավերևում թռչող անօդաչու թռչող սարքերի ձայնը և պայթյունները առավոտյան ժամը երեքի սահմաններում։

Baza-ն էլ նշում է, որ Վորոնեժի շրջանում անօդաչուներից մեկն ընկել է անցնող մեքենայի վրա, վարորդը վիրավորվել է, նրան առաջին բուժօգնություն է ցուցաբերվել։ Նույն տարածքում խոցված անօդաչու թռչող սարքի բեկորները վնասել են բնակելի շենք և ֆերմա։ Վորոնեժում անօդաչու թռչող սարքը վնասել է արդյունաբերական ձեռնարկության ապակիները։

ՌԴ ՊՆ-ն էլ հայտնել է, որ գիշերը Ռուսաստանի յոթ շրջաններում 49 անօդաչու թռչող սարք է խոցվել։ Գերատեսչության տվյալներով՝ Ռոստովի մարզում 25 անօդաչու թռչող սարք են խոցել, ութը՝ Վոլգոգրադի, վեցը՝ Կուրսկի, չորսը՝ Յարոսլավլի շրջանի, և երկուականը՝ Բելգորոդի, Վորոնեժի և Կրասնոդարի երկրամասի վրա։

Միաժամանակ Յարոսլավլի և Կուրսկի շրջանների նահանգապետերը հայտնել են շատ ավելի զանգվածային հարձակման մասին։ Նրանց տվյալներով՝ 17 անօդաչու թռչող սարք է խոցվել Կուրսկի շրջանում, 5-ը ՝ Յարոսլավլի շրջանում։

Թարգմանությունը՝ Էմմա Չոբանյանի