Թրամփն ակնարկել է Պուտինի հետ տեղի ունեցած զրույցի մասին

ԱՄՆ նախագահ Դոնալդ Թրամփը ակնարկել է, որ զրույց է ունեցել ՌԴ նախագահ Վլադիմիր Պուտինի հետ, փոխանցում է DW-ի ռուսական ծառայությունը։ Ամերիկացի առաջնորդը նախօրեին լրագրողների հետ ճեպազրույցում խոսել է Վաշինգտոնում Bombardier CRJ700 մարդատար ինքնաթիռի վթարի մասին։

Նա խոսել է վթարի զոհերի քաղաքացիության մասին՝ հավելելով, որ վարչակազմը կապի մեջ է ներգրավված երկրների մեծ մասի հետ։ Կապված նրա հետ, որ ինքնաթիռում եղել են գեղասահորդներ՝ ԽՍՀՄ-ից ու Ռուսաստանից, լրագրողները Սպիտակ տան ղեկավարին հարցրել են, թե արդյոք նա հեռախոսազրույց ունեցե՞լ է Պուտինի հետ։ «Ո՛չ, չեմ խոսել», – ասել է Թրամփը, հետո հավելել. «Ո՛չ դրա մասին»։

Մի քանի օր առաջ Պուտինը պատրաստակամություն էր հայտնել բանակցել Ուկրաինայում պատերազմի ավարտի մասին, այդ թվում՝ ԱՄՆ-ի հետ՝ մեկնաբանելով ԱՄՆ նախագահ Դոնալդ Թրամփի հայտարարությունները պատերազմը հնարավորինս շուտ դադարեցնելու անհրաժեշտության մասին։ ՌԴ նախագահի խոսքով՝ Կիևը խոչընդոտում է բանակցությունների մեկնարկին։

ԱՄՆ նախագահի պաշտոնը ստանձնելուց հետո Դոնալդ Թրամփը բացահայտորեն կոչ է արել Պուտինին դադարեցնել պատերազմն Ուկրաինայի դեմ, իսկ «գործարք» կնքելուց հրաժարվելու դեպքում սպառնացել է ԱՄՆ-ի կողմից բարձր հարկեր, տուրքեր և պատժամիջոցներ կիրառել «բոլոր ռուսական ապրանքների վրա»։

Իր հերթին էլ Ուկրանայի նախագահ Վլադիմիր Զելենսկին հայտնել է, որ Կիևը պատրաստ է ուղիղ բանակցությունների Մոսկվայի հետ պատերազմի ավարտի մասին, եթե դրանք վարվեն «ուժեղ դիրքերից», որը հնարավոր է, եթե ԱՄՆ նախագահը ապահովի անվտանգության երաշխիքներ։

Նման երաշխիք կարող է լինել անդամակցությունը ՆԱՏՕ-ին կամ արևմտյան խաղաղապահների ներկայությունը ԱՄՆ-ի մասնակցությամբ։

Օրերս էլ Պուտինը  չէր բացառել Զելենսկիի հետ բանակցությունները՝ միաժամանակ մերժելով նրա հետ խաղաղության պայմանագիր ստորագրելու հնարավորությունը։ Նա հայտարարել էր, որ  Զելենսկիին լեգիտիմ չի համարում։

Թարգմանությունը՝ Էմմա Չոբանյանի