09.08.2026 | 22:30
Արթուր Ղարիբյանը հաղթական դուբլ է գրանցել «Զենիթի» դեմ խաղում. ՏԵՍԱՆՅՈՒԹ
Գազայի հատվածից ազատ արձակված պատանդին հանձնել են իսրայելցի զինվորականներին
Քաղաքականություն
30.01.2025 | 15:14
Իսրայելական բանակի զինծառայող Ագամ Բերգերը, որը 2023 թվականի հոկտեմբերի 7-ից Գազայի հատվածում պատանդ էր պահվում պաղեստինյան ՀԱՄԱՍ-ի կողմից, ազատ է արձակվել հրադադարի գործարքի շրջանակում։ Անկլավում գտնվող Ջեբալիյա ճամբարում նրան հանձնել են Կարմիր խաչի միջազգային կոմիտեին, ապա վերադարձրել Իսրայել։
«Իսրայելի կառավարությունը ջերմորեն ողջունում է զինծառայող Ագամ Բերգերին։ Նրա ընտանիքին համապատասխան մարմինները ծանուցել են, որ նա վերամիավորվել է մեր ուժերին»,- ասվում է Իսրայելի վարչապետ Բենիամին Նեթանյահուի գրասենյակի հաղորդագրության մեջ։
Ագամ Բերգերը 2023 թվականի հոկտեմբերի դրությամբ սահմանին տիրող իրավիճակի համար պատասխանատու կին զինվորներից մեկն է եղել։ Նահալ Օզ բազայում չորս այլ կին զինվորների հետ նրա առևանգման կադրերը հրապարակվել են 2024 թվականի մայիսին:
Սպասվում է, որ ՀԱՄԱՍ-ը այսօր՝ հունվարի 30-ին, գերությունից կազատի 29-ամյա Արբել Յեհուդին և 80-ամյա Գադի Մոզեսին։ Ընդհանուր առմամբ, հունվարի 19-ին ուժի մեջ մտած համաձայնագրի առաջին փուլում պաղեստինցի զինյալները պետք է ազատեն 33 պատանդի։ Reuters-ի փոխանցմամբ՝ նրանցից ողջ են 25-ը։
Թարգմանությունը՝ Տաթև Ֆռանգյանի
