06.10.2026 | 15:55
Կառլոս Ալկարասը` Տոկիոյի մրցաշարի հաղթող. ՏԵՍԱՆՅՈՒԹ
Մամիկոն Ասլանյանը դատապարտվեց 4 տարի 4 ամիս ժամկետով ազատազրկման, որից 2 տարի 7 ամիսը եղել է կալանքի տակ
Հասարակություն
29.01.2025 | 14:03
Վանաձոր համայնքի նախկին ղեկավար Մամիկոն Ասլանյանը դատապարտվեց 4 տարի 4 ամիս ժամկետով ազատազրկման։ Հակակոռուպցիոն դատարանը՝ դատավոր Սարգիս Դադոյանի նախագահությամբ, հաշվակցելով կալանքի տակ անցկացրած ժամկետը՝ Ասլանյանի նկատմամբ վերջնական պատժաչափ նշանակեց 1 տարի 9 ամիս ժամկետ ազատազրկումը, տուգանք` 500 հազար դրամի չափով: Նախկին քաղաքապետը նաև 3 տարով զրկված է պաշտոն զբաղեցնելու իրավունքից։
Հիշեցնենք՝ 2024 թվականի հուլիսին, գրեթե 3 տարի անազատության մեջ գտնվելուց հետո, Մամիկոն Ասլանյանը 10 մլն գրավի դիմաց ազատ արձակվեց։ Նրա նկատմամբ ընտրված խափանման միջոց գրավը դատարանը թողեց անփոփոխ՝ մինչև վճռի օրինական ուժի մեջ մտնելը։
Մամիկոն Ասլանյանին մեղադրանք էր առաջադրվել պաշտոնեական լիազորությունները չարաշահելու, պաշտոնեական լիազորություններն անցնելու, պաշտոնեական կեղծիքի հատկանիշներով։
Ըստ մեղադրական եզրակացության՝ Մամիկոն Ասլանյանը, 2016 թվականի հոկտեմբերի 10-ից մինչև 2021 թվականի հոկտեմբերի 10-ն ընկած ժամանակահատվածում զբաղեցնելով ՀՀ Լոռու մարզի Վանաձոր համայնքի ղեկավարի պաշտոնը, հանդիսանալով տեղական ինքնակառավարման մարմնում մշտապես իշխանության ներկայացուցչի գործառույթներ իրականացնող գործադիր մարմնի, ինչպես նաև համայնքապետարանում կազմակերպական-տնօրինչական գործառույթներ իրականացնող պաշտոնատար անձ, չարաշահել է իր պաշտոնական լիազորությունները, դիտավորությամբ ակնհայտորեն դուրս է եկել իր լիազորությունների շրջանակից և կատարել է պաշտոնական կեղծիք:
Ի սկզբանե, քրեական գործով կալանավորված էր միայն Մամիկոն Ասլանյանը, մյուսների նկատմամբ որպես խափանման միջոց էր ընտրվել ստորագրությունը՝ չհեռանալու մասին։
Մամիկոն Ասլանյանն իրեն առաջադրված մեղադրանքը չի ընդունում։ Ըստ նրա՝ իր նկատմամբ քաղաքական հետապնդում է իրականացվում։
Գործով անցնող մյուս ամբաստանյալ Սուրեն Աբովյանը ևս մեղավոր ճանաչվեց առաջադրված մեղադրանքներում՝ ազատազրկման դատապարտվելով 2 տարի ժամկետով, տուգանք կվճարի 400 000 ՀՀ դրամի չափով և հանրային ծառայության պաշտոն զբաղեցնելուց զրկվեց 3 տարի ժամկետով։
Ամբաստանյալ Արևհատ Հովհաննիսյանը ևս մեղավոր ճանաչվեց, նա տուգանվեց 500 000 դրամի չափով։
Ռոզա Վարդանյան
